QARABAĞ MÜHARİBƏSİ ƏLİLLƏRİ VƏ VETERANLARI İCTİMAİ BİRLİYİNİN SƏDRİ MEHDİ MEHDİYEVİN ÇIXIŞI
Hörmətli mərasim iştirakçıları!
Möhtərəm cənab Heydər Əliyev hakimiyyətə gəldikdən sonra ölkəmizdə qardaş qırğınının qarşısının alınması ilə yanaşı, dövlətin sabitləşdirilməsi ilə yanaşı, dövlət çevrilişləri cəhdlərinin qarşısının alınması ilə yanaşı, bizləri, yəni müharibə məhrumiyyətlərinə düçar olmuş insanları da unutmadı. Qısa bir zamanda möhtərəm Prezidentimizin Fərmanına əsasən dövlət büdcəsindən Qarabağ müharibəsi əlillərinin xaricdə müalicəsi üçün böyük həcmdə vəsait ayrıldı.
Ondan sonra Qarabağ müharibəsi əlillərinə Prezident vəsaiti təyin olundu. 1997-ci ildən başlayaraq, Qarabağ müharibəsi əlilləri və şəhid ailələri mənzillə, fərdi evlərlə, minik maşınları ilə təmin olunur. Artıq bu günədək mindən çox əlil “Oka” markalı minik maşını ilə təmin edilibdir. 700-dən çox Qarabağ müharibəsi əlili və şəhid ailəsi fərdi evlərlə, yaxud mənzillə təmin olunubdur. Bunlar hamısı dövlətin sosial siyasətidir. Bu siyasətin həyata keçirilməsində Əmək və Əhalinin Sosial Müdafiəsi Nazirliyinin danılmaz xidməti vardır.
Rusiya kimi bir dövlətin Prezidenti Vladimir Putin Azərbaycana səfərdən qayıtdıqdan sonra Əfqanıstan müharibəsi əlillərinə cüzi sayda pulsuz “Oka” maşını verdi. Amma Azərbaycan görün nə qədər maşın veribdir və bu işi davam etdirir.
Cənab Baş nazir, Qaradağ rayonunda, Mingəçevirdə və digər rayonlarda tikdirdiyiniz evlərdə 100-dən çox şəhid ailəsinə, Qarabağ müharibəsi əlilinə mənzil verildiyinə, onlara daim himayədarlıq etdiyinizə görə təşəkkür edirik. Hesab edirik ki, bu, dövlətin və şəxsən Sizin bu insanlara olan münasibətinizin misilsiz nümunəsidir. Təbii ki, bunu gözü götürməyənlər də var. Hətta vaxtilə hakimiyyətdə olmuş, Azərbaycanı dağıtmış və qardaş qırğını törətmiş insanlar yaranmış sabitlikdən sonra hakimiyyəti şirin görüb yenidən ona can atırlar və Prezident kürsüsünə yiyələnmək istəyənlər də var. Onlar hətta heç bir iş görmədikləri halda, şəhid ailələrinin, Qarabağ müharibəsi əlillərinin adından danışmaq istəyirlər.
Cənab Baş nazir, sizi əmin etmək istəyirəm ki, bizim birliyin 7 min üzvü və onların ailə üzvləri Sizi dəstəkləyirlər. Çünki müharibəyə gedib şəhid olanlar, sağlamlığını itirənlər bunu hansısa siyasi qüvvələr üçün yox, məhz dövləti, Vətəni və dövlətçiliyi qorumaq naminə ediblər. Dövlətçiliyi də möhkəmləndirən, Azərbaycan torpaqlarını düşmən tapdağından azad edə biləcək qüvvə cənab Heydər Əliyevdən sonra məhz Sizsiniz. Ona görə də biz hər zaman Sizinlə olacağıq.
Heydər Əliyevə və onun davamçısı İlham Əliyevə eşq olsun!
X X X
ƏLİ NAĞIYEV: Əziz həmvətənlər, istəmirəm sizi çox intizarda qoyam. Hamımız xahiş edək ki, hörmətli Baş nazirimiz İlham müəllim sizə ürək sözlərini desin, öz fikirlərini bölüşsün.
Azərbaycan Respublikasının Baş naziri İlham Əliyev mərasimdə çıxış etdi.
Bölmənin digər xəbərləri
