QAZAXISTANIN PAYTAXTINDA “TURAN EKSPRESS” QƏZETİ NƏŞRƏ BAŞLAMIŞDIR
Qəzetin təqdimat mərasimində Astana mətbuat mərkəzinin fəxri prezidenti Toleqen Muxamedcanov, Azərbaycanın Qazaxıstandakı səfiri Lətif Qəndilov, qəzetlərin baş redaktorları, milli mədəniyyət mərkəzlərinin sədrləri, Azərbaycan diasporunun nümayəndələri iştirak etmişlər.
T.Muxamedcanov bu münasibətlə iştirakçıları təbrik edərək demişdir:
-“Turan-ekspress” qəzeti Qazaxıstanla Azərbaycan arasında körpü olacaq. Bizim dövlətlərimiz arasında həmişə dost münasibətlər olub və indi də var. Azərbaycan Prezidenti İlham Əliyevin bu ilin mart ayında Qazaxıstana səfəri buna sübutdur.
Ölkəmizin Qazaxıstandakı səfiri Lətif Qəndilov yeni qəzetin baş verən hadisələri obyektiv işıqlandıracağına, iki dövlət arasında mehriban münasibətlərin möhkəmlənməsində mühüm rol oynayacağına ümid etdiyini bildirmişdir.
“Turan-ekspress” qəzetinin baş redaktoru Vidadi Salahov tədbir iştirakçılarına minnətdarlıq etmiş və bildirmişdir ki, qəzet əsasən rus dilində çap ediləcək, qazax dilində də materiallarımız olacaq. Yeni nəşr Qazaxıstan, Azərbaycan və Rusiyada yayılacaqdır.
