Qəbələ Zirvə Görüşü ilə Türk dünyasının yeni inkişaf mərhələsi başlayıb - ŞƏRH
Bakı, 8 oktyabr, AZƏRTAC
Türk Dövlətləri Təşkilatı bu gün dünyanın ən mühüm geosiyasi güc mərkəzlərindən birinə çevrilməkdədir. Ortaq tarix, dil və mədəni köklərə söykənən bu birlik, artıq sadəcə, əməkdaşlıq platforması deyil, qlobal miqyasda siyasi, iqtisadi və təhlükəsizlik baxımından önəmli amil kimi tanınır. Türk dövlətləri arasında sıx inteqrasiya, qarşılıqlı hörmət və birgə maraqlara əsaslanan münasibətlər bu təşkilatı XXI əsrin beynəlxalq nizamında xüsusi mövqeyə gətirib. “Regional sülh və təhlükəsizlik” mövzusuna həsr olunan 12-ci Zirvə Görüşü həm Türk dünyasının gələcək istiqamətini müəyyənləşdirən, həm də qlobal sabitlik və inkişaf baxımından yeni prioritetləri ortaya qoyan mühüm hadisə oldu.
Bu fikirləri AZƏRTAC-a açıqlamasında Milli Məclisin deputatı Fəzail İbrahimli bildirib.
Zirvə Görüşünün Qəbələdə keçirilməsinin təsadüfi olmadığını vurğulayan deputat deyib: “Azərbaycanın bu gün Türk dünyasında oynadığı aparıcı rol, ölkənin regional sülh proseslərinin mərkəzində dayanması bu tədbiri daha mənalı etdi. Bu Zirvə Görüşü türk birliyinin artıq praktik mərhələyə qədəm qoyduğunu göstərdi. Qlobal miqyasda geosiyasi dəyişikliklərin baş verdiyi bir zamanda türk ölkələrinin ortaq səylərlə regional sabitliyə, enerji təhlükəsizliyinə və iqtisadi əməkdaşlığa yönəlməsi böyük əhəmiyyət daşıyır. Sammitin “Regional sülh və təhlükəsizlik” mövzusuna həsr olunması da türk dövlətlərinin həm öz regionlarında, həm də beynəlxalq arenada məsuliyyətli aktor kimi çıxış etmək niyyətinin göstəricisidir. Prezident İlham Əliyevin ötən ilin fevralında andiçmə mərasimində Türk dünyası ilə bağlı səsləndirdiyi fikri bu gün artıq konseptual reallığa çevrilib. Azərbaycan Prezidenti TDT-nin bizim üçün əsas beynəlxalq təşkilat olduğunu vurğulayaraq demişdi: "Bizim başqa ailəmiz yoxdur. Bizim ailəmiz Türk dünyasıdır. Əgər kimsə hesab edir ki, biz başqa yerdə ailə axtarmalıyıq, deyə bilərəm ki, bizi heç yerdə gözləmirlər və bunu artıq gizlətmirlər...". Qəbələdəki Zirvə Görüşündə də Prezident İlham Əliyev vurğuladı ki, Türk Dövlətləri Təşkilatı artıq ciddi geosiyasi mərkəzə çevrilib. Təşkilatın beynəlxalq nüfuzu artmaqda, dövlətlər arasındakı əməkdaşlıq dərinləşməkdədir”.
Azərbaycanın TDT üzvləri arasında əməkdaşlığın dərinləşməsi prosesinə verdiyi töhfənin də diqqətəlayiq olduğunu deyən Fəzail İbrahimli əlavə edib: “Bu prosesdə Azərbaycanın rolu müstəsnadır. Azərbaycanın 2020-ci ildə qazandığı Qarabağ Zəfəri təkcə bir müharibənin qalibiyyəti deyildi. O, Türk dünyasında ruhun dirçəlişinə, özünəinamın bərpasına səbəb oldu. Bu Qələbə göstərdi ki, türk dövlətləri yalnız mədəni qardaşlığa deyil, siyasi və hərbi həmrəyliyə də qadirdir. Türkiyənin o dövrdə göstərdiyi dəstək Türk dünyasının bütün üzvlərində həm qürur, həm də ortaq mənsubiyyət hissini artırdı”.
Deputat, həmçinin qeyd edib ki, ətrafımızda çox hadisələr, təhdidlər, hədələr, risklər var. Amma türk dövlətlərin birgə addımları, perspektivə yönəlmiş qərarları göstərir ki, biz müdafiəmizi, təhlükəsizliyimizi daha çox gücləndirəcəyik. Bu baxımdan Avropa İttifaqında xüsusi çəkisi olan Macarıstanın Azərbaycanda Zirvə Görüşündə iştirakı olduqca önəmlidir. Türk Dövlətləri Təşkilatı təkcə regionun deyil, artıq qlobal siyasətin də oyunçusuna çevrilməkdədir.
F.İbrahimlinin sözlərinə görə, gənc və dinamik əhalisi, strateji yerləşməsi, enerji və ticarət yollarına nəzarəti ilə TDT gələcəkdə bölgələrarası balans yaradan, münaqişələrin qarşısını alan və beynəlxalq sabitliyə töhfə verən təşkilata çevrilə bilər. Bu potensialı reallığa çevirən əsas qüvvə isə Azərbaycan və Türkiyə tandemidir. Qəbələdəki Zirvə Görüşü, sadəcə bir görüş deyil, Türk dünyasının gələcək xəritəsini çəkən strateji toplantıdır. Qəbələ Zirvə Görüşü ilə Türk dünyasının yeni inkişaf mərhələsi başlayıb. Burada qəbul edilən qərarlar təkcə siyasi və iqtisadi deyil, həm də mənəvi birliyin, qarşılıqlı etimadın möhkəmlənməsinə xidmət edəcək. Prezident İlham Əliyevin çıxışı bu birliyin strateji vizyonunu bir daha ortaya qoydu: sülh, təhlükəsizlik, inkişaf və qardaşlıq üzərində qurulan güclü Türk dünyası artıq qlobal siyasətin ayrılmaz hissəsidir.
Bölmənin digər xəbərləri
