QƏBƏLƏDƏ İLK TURİZM VƏ OTELÇİLİK PEŞƏ TƏDRİSİ MƏKTƏBİ İSTİFADƏYƏ VERİLMİŞDİR
AZƏRTAC xəbər verir ki, sentyabrın 27-də Təhsil Nazirliyi Qəbələ Turizm və Otelçilik Peşə Tədrisi Məktəbinin inzibati binasının açılışı olmuşdur.
Təhsil naziri Misir Mərdanov tədbirdə çıxış etmiş, peşə təhsilinin inkişafının vacibliyindən danışmış, otelçilik, turizm sahəsi üzrə kadrların hazırlanması istiqamətində görülən işlər barədə məlumat vermişdir. Bildirilmişdir ki, bu məktəb turizm və otelçilik üzrə kadrlar hazırlayacaq ilk təhsil ocağıdır. Burada eyni vaxtda 400 uşaq və gənc təhsil ala biləcəkdir.
İnşasına 2006-cı ildə başlanmış bina müasir texniki avadanlıqla təmin olunmuş, qızlar və oğlanlar üçün yataqxana kompleksi, qazanxana da tikilmişdir. Tədris ocağında dərs otaqları, laboratoriya, emalatxana, konfrans və idman zalları, kompyuter otağı, kitabxana vardır. Gənclərin otelçilik və turizm peşələrinə yiyələnmələri üçün bütün lazımi şərait yaradılmışdır.
Elə həmin gün rayonun Qəmərvan kəndində yeni tikilmiş 360 yerlik orta məktəb binasının da açılışı olmuşdur. Regionların sosial-iqtisadi inkişafı Dövlət proqramı çərçivəsində inşa olunan tədris ocağında dərs otaqları, idman zalı, kitabxana müasir havalandırma və içıqlandırma sistemlərilə təmin olunmuşdur.
Məktəbin açılışında təhsil naziri Misir Mərdanov iştirak etmişdir.
Bölmənin digər xəbərləri
