QƏLƏBƏNİN 60 İLLİYİ MÜNASİBƏTİLƏ BABƏKDƏ SİLSİLƏ TƏDBİRLƏR KEÇİRİLƏCƏKDİR
Babək Rayon İcra Hakimiyyətindən AZƏRTAC-ın müxbirinə bildirmişlər ki, 9 May Qələbə gününə qədər rayonun bütün idarə, müəssisə və təşkilatlarında tematik konfranslar və seminarlar keçiriləcək, mədəniyyət müəssisələrində ədəbi-bədii kompozisiyalar təşkil ediləcək, ümumtəhsil məktəblərində isə bu mövzu ilə bağlı inşa yazı müsabiqələri keçiriləcəkdir. Rayonda yaşayan Böyük Vətən müharibəsinin 51 iştirakçısı ilə görüşlərin keçirilməsi, müharibədə həlak olan babəklilərin xatirəsinin anılması da tədbirlər planına daxildir.
9 May yubiley gününədək Böyük Vətən müharibəsində həlak olanların xatirəsinə Babək qəsəbəsində, rayonun Nehrəm, Tumbul, Xətai yaşayış məntəqələrində ucaldılan abidələrin, Cəhri kəndində Sovet İttifaqı qəhrəmanı Qəzənfər Əkbərovun büstünün ətrafında abadlıq işləri aparmaq nəzərdə tutulmuşdur.
