“Qərbi Azərbaycan Kuboku”nun bağlanış mərasimi keçirilib
Bakı, 7 iyul, AZƏRTAC
İyulun 7-də Qərbi Azərbaycan İcmasının təşkilatçılığı ilə Bakı Tennis Akademiyasında “Qərbi Azərbaycan Kuboku” minifutbol turnirinin bağlanış və mükafatlandırma mərasimi keçirilib.
AZƏRTAC xəbər verir ki, turnirdə Qərbi Azərbaycanın rayon icmalarını təmsil edən gənclərdən ibarət 20 komanda iştirak edib. Turnirin keçirilməsində məqsəd Qərbi Azərbaycana qayıdış ideyası ətrafında icma üzvlərinin sıx birləşməsi, gənclər arasında kommunikasiyanın möhkəmləndirilməsi, eyni zamanda, sağlam həyat tərzinin təbliği, icmanın fəaliyyətində kütləviliyin artırılması və sağlam cəmiyyətin formalaşmasına dəstək verməkdir.
Qərbi Azərbaycan İcması Qadınlar Şurasının sədri, VI çağırış Milli Məclisin deputatı Məlahət İbrahimqızı “Ən yaxşı oyunçu” və “Ən yaxşı qapıçı” nominasiyalarını qaliblərə təqdim edib. Sonra ilk üç yerin qalibləri olan “Qafan”, “Qəmərli” və “Loru” komandalarını AFFA-nın icraçı baş katibi Sərxan Hacıyev, gənclər və idman nazirinin müavini Fərhad Hacıyev, Qərbi Azərbaycan İcmasının Gənclər Şurasının sədr müavini, VI çağırış Milli Məclisin deputatı Kamal Cəfərov, VI çağırış Milli Məclisin deputatları Səbinə Xasayeva, Məlahət İbrahimqızı müvafiq diplom, medal və xatirə hədiyyələri ilə təltif ediblər.
Daha sonra qalib “Qafan” komandasına Milli Məclisin deputatı, Qərbi Azərbaycan İcmasının sədri Əziz Ələkbərli tərəfindən kubok təqdim olunub.
Mükafatlandırma mərasimində, həmçinin Qərbi Azərbaycan İcmasının Nəzarət-təftiş komissiyasının sədrinin müavini, VI çağırış Milli Məclisin deputatı Şahin İsmayilov, QAİ Ziyalılar Şurasının üzvü, VI çağırış Milli Məclisin deputatı Emin Hacıyev, Qərbi Azərbaycan İcması Ziyalılar Şurasının üzvü, VI çağırış Milli Məclisin deputatı Azay Quliyev iştirak ediblər
Sonda qalib komanda ilə xatirə şəkli çəkdirilib.
Bölmənin digər xəbərləri
