Qiyməti 4 manatdır, bəs keyfiyyəti necədir? - REPORTAJ
Bakı, 29 noyabr, AZƏRTAC
Azərbaycan Qida Təhlükəsizliyi Agentliyinin (AQTA) əməkdaşlarının dönərxanalarda növbəti yoxlama tədbirləri zamanı nöqsanlar aşkarlanıb. Monitorinq tədbirləri paytaxtın Binəqədi, Yasamal və Nərimanov rayonlarını əhatə edib. AZƏRTAC-ın müxbiri yoxlama tədbirlərində iştirak edərək reportaj hazırlayıb. Materialı təqdim edirik:
“Bayaqdan burada gözləyirik, bizə bir dönər versinlər, gedək...”
Bu sözləri dönərxanada aparılan yoxlama zamanı ətrafdan bizi izləyən bir tələbədən eşidirəm. Əslində, həmin tələbəyə obyektdə yoxlamalar aparıldığını deyirik, hazırlanan dönərlərin qida təhlükəsizliyi normalarına cavab verməməsi ehtimalını da bildiririk. Ancaq təəssüf ki, bu xəbərdarlığımızdan tələbənin nəticə çıxarmadığını başa düşürük.
Bakıda bir sıra insanlar, əsasən də tələbələr gündəlik qida rasionunda dönərdən daha çox istifadə edir.
Bəs, dönər alarkən insanlar onun keyfiyyəti, hansı şəraitdə hazırlanması ilə bağlı məsələlərə diqqət yetirirmi?
Yoxlama tədbirləri zamanı müşahidələr əsasında məlum oldu ki, insan sağlamlığı üçün önəm daşıyan qida keyfiyyəti ilə bağlı məsələyə əksər şəxslər diqqət yetirmir. Onlar rahatca gəlib dönərxanada əyləşir və sifarişlərini verirlər.
Yoxlamalardakı ilk marşrutumuz olan Binəqədi rayonundakı “Manqal dönəri” adlanan restoranda da eyni halın şahidi olduq. Sadəcə, burada bəzi müştərilər çəkiliş qruplarını görəndən sonra obyekti tərk etdilər.
Yoxlamalarda sözügedən obyektdə saxlama müddəti ötmüş qida məhsullarından istifadə edildiyi, müəssisədə çalışan işçilərin tibbi müayinədən keçmədiyi aşkarlandı.
Dönərdə istifadə edilən mayonez məhsulunun etiket məlumatlarına əsasən saxlanma temperaturunun 0-18 dərəcə olsa da, burada mayonez 23-25 dərəcədə saxlanılırdı. Aşkarlanmış bu kimi neqativ hallara görə müəssisə rəhbəri barəsində protokol tərtib olundu.
Bakı Dövlət Universitetinin yaxınlığında yerləşən dönərxanada isə vəziyyət heç də ürəkaçan deyildi. Nəzərə alaq ki, dönərxana çox sayda tələbənin istifadə etdiyi gündəlik gediş-gəliş yolunun üzərində yerləşir. Ona görə də tələbələr mütəmadi olaraq dönərxanalara müraciət edirlər. Hələ üstəlik dönərlərin qiyməti də ucuz deyil. Çörəkdə və lavaşda hazırlanmasından asılı olmayaraq, qiymətlər 3,5-4 manat arasında dəyişir.
“Ağdəniz lahmacun” adlı obyektə daxil olduqda ətin, toyuğun rəngindən və ətrafa saçdığı qoxudan hər şey məlum idi. İşçilərin isə heç bir sanitar gigiyenik qaydalara uyğun olmadığı üzə çıxdı.
Müəssisə rəhbəri isə tələb edilən bütün qaydalara riayət edildiyini bildirsə də, görünən mənzərə başqa idi. Müəssisənin bağlanacağı barədə məlumat isə sahibkar üçün gözlənilməz oldu.
Nərimanov rayonundakı dönərxananın qapıları isə elə bir müddət əvvəl bağlanmışdı. Belə ki, buradan götürülən dönərin sınaq nümunələrində uyğunsuzluq aşkar edilmişdi.
Qeyd edək ki, antisanitar şəraitdə istehlak edilən dönər birbaşa insan sağlamlığı üçün təhlükə mənbəyidir. Bu kimi hallarda ilk olaraq qida zəhərlənmələri baş verir, həzm sistemi ciddi fəsadlara məruz qalır. Buna görə də, vətəndaşlar dönərxanalarda qidalanarkən buna diqqət yetirməlidir. Müsbət haldır ki, artıq bu kimi vəziyyətlərdə sosial şəbəkələrdə Agentliyə ünvanlanmış müraciətlərin sayının artdığı müşahidə edilir. Ona görə də mütəmadi olaraq Agentlik tərəfindən yoxlamalar həyata keçirilir.
Bölmənin digər xəbərləri
