Qonaqpərvərlik baxımından Azərbaycan Avropadan üstündür
Bakı, 5 oktyabr (AZƏRTAC). Qonaqpərvərlik baxımından Azərbaycan Avropadan üstündür.
AZƏRTAC xəbər verir ki, bu sözləri İkinci Beynəlxalq Humanitar Forumunda iştirak etmək üçün ölkəmizdə səfərdə olan “Delovoy Peterburq” qəzetinin baş redaktoru Maksim Vasyukov demişdir.
Ölkəmizə ilk dəfə səfər etdiyini deyən qonaq Azərbaycanın bu qədər müasir, zəngin və inkişaf etmiş olduğunu təsəvvür etmədiyini söyləmişdir. O demişdir: “Mən Avropanın bir çox ölkəsində olmuşam, Azərbaycan onların heç birindən geridə qalmır, hətta qonaqpərvərlik cəhətdən bir çox Avropa ölkəsindən üstündür”. Azərbaycana gəlməmişdən qabaq ölkəmiz haqqında kifayət qədər məlumatı olduğunu vurğulayan M.Vasyukov qısa vaxt ərzində respublikamızın sürətli inkişafına heyran qaldığını qeyd etmişdir. O, Azərbaycanın yaxın bir zamanda inkişaf etmiş ölkələr siyahısında olacağına əminliyini ifadə etmişdir.
Bölmənin digər xəbərləri
