“Rafah” keçid məntəqəsi əcnəbilərin Qəzzadan çıxması üçün açılıb
Bakı, 1 noyabr, AZƏRTAC
Fələstinlə İsrail arasında münaqişə kəskinləşəndən bəri “Rafah” nəzarət-buraxılış məntəqəsi ilk dəfə olaraq Qəzza sektorunu tərk etmək istəyən xarici ölkə vətəndaşları və yaralı fələstinlilər üçün açılıb.
AZƏRTAC Al Jazeera telekanalına istinadla xəbər verir ki, ilk qaçqınlar Qəzza sektoru ilə Misir sərhədini keçməyə başlayıb. Onların arasında xarici ölkə vətəndaşları və ağır yaralanan fələstinlilər də var.
Bir müddət öncə Misirin Qəzza sektorunu tərk etmək istəyən 400 xarici ölkə vətəndaşını qəbul etmək barədə ABŞ və İsraillə müqavilə bağladığı barədə məlumatlar yayılıb.
Xatırladaq ki, oktyabrın 7-də HƏMAS hərəkatının silahlı qanadı olan “İzzəddin əl-Kassam” briqadasının İsrailin nəzarətində olan ərazilərə hücumlarından sonra Yaxın Şərqdə vəziyyət gərginləşib. HƏMAS-ın hücumuna cavab olaraq İsrail ordusu Qəzza sektorunda, Livan və Suriyanın ayrı-ayrı rayonlarında əməliyyatlara başlayıb.
Bölmənin digər xəbərləri
