RAMİL SƏFƏROVUN İŞİNƏ DAİR NÖVBƏTİ MƏHKƏMƏ DİNLƏMƏLƏRİ MAYIN 10-DA OLACAQDIR
AZƏRTAC-ın xüsusi müxbiri xəbər verir ki, fevralın 8-də Budapeşt məhkəməsində Azərbaycan Silahlı Qüvvələrinin zabiti, baş leytenant Ramil Səfərovun barəsində cinayət işi ilə əlaqədar ikinci məhkəmə dinləmələri olmuşdur.
Hakim Andraş Vaşkutinin sədrlik etdiyi məhkəmədə R.Səfərov prosedurla bağlı suallardan sonra hakimin suallarına cavab vermişdir. Məhkəmənin iclası macar dilində gedir və türk dilinə tərcümə olunurdu. İclas salonunda Azərbaycan səfirliyinin əməkdaşları, diasporumuzun və respublikamızın KİV-lərinin nümayəndələri də var idi.
Məhkəmədə R.Səfərovu macarıstanlı vəkillər, doktor Peter Zalai və doktor Georgi Macar, habelə əlaqələndirici statusu olan azərbaycanlı vəkil Adil İsmayılov müdafiə edirdilər.
Hakim A.Vaşkutiyə Azərbaycan Müdafiə Nazirliyinin əlavə olunmuş məktubu ilə birlikdə ölkəmizin səfirliyinin notası təqdim edilmişdir. Məktubda şahid Anar Əliyevin xəstəliyi ilə əlaqədar Budapeştə gələ bilmədiyi göstərilir.
Məhkəmə iclasında məhkəmə ekspertləri - psixiatr və psixoloq çıxış edərək, R.Səfərovun testdən keçirilməsinin nəticələri barədə hesabat vermişlər. Vəkillərin xahişi ilə məhkəmə R.Səfərovun macarıstanlı məhkəmə ekspertləri tərəfindən növbəti testdən keçirilməsində azərbaycanlı psixoloqların müşahidəçi kimi iştirakına razılıq vermişdir. Həmin ekspertizanın zəruriliyi nəzərə alınaraq, məhkəmənin növbəti iclası bu il mayın 10-na təyin edilmişdir.
