Quba, 26 sentyabr, AZƏRTAC

"Tottenhem" barədə geniş məlumat verməyə ehtiyac yoxdur, çünki hər kəsə bu komandanın gücü məlumdur".

Bu sözləri AZƏRTAC-a açıqlamasında vaxtilə "Qarabağ"da oynamış veteran futbolçu Rauf Əliyev keçmiş komandasının UEFA Avropa Liqasının əsas mərhələsinin ilk turunda səfərdə İngiltərənin "Tottenhem" klubuna qarşı keçirəcəyi oyunla bağlı danışarkən deyib.

O, Ağdam klubunun səfərdən uğurlu nəticə ilə dönəcəyinə inandığını bildirib: "Qarabağ" hər zaman Azərbaycanı yaxşı nəticələrlə sevindirməyi bacarıb. Əlbəttə, çox çətin oyun olacaq. Düşünürəm ki, komanda səfərdən Vətənə heç-heçə ilə qayıtsa, yaxşı olar".

R.Əliyev Azərbaycan çempionunun Avropa Liqasındakı şanslarını da dəyərləndirib: "Qarabağ"ın turnirdə qalib gələ biləcəyi rəqiblər çoxdur. Düzdür, bunlar arasında güclü kollektivlər də yer alıb. Onlardan biri kimi "Tottenhem"i qeyd edə bilərəm. Artıq "köhlən atlar" hamı üçün ciddi rəqib hesab olunur. Təmsilçimizin növbəti mərhələyə yüksəlmək üçün şansı var".

Qeyd edək ki, bu gün “Tottenhem Hotspur” stadionunda oynanılacaq görüş Bakı vaxtı ilə saat 23:00-da start götürəcək.