RƏNGLƏRİN MUSİQİSİ
Həmin əsərlərin müəllifi bütün dünyada tanınmış bir insan - SSRİ xalq artisti, Azərbaycanın xalq artisti, Dövlət mükafatı laureatı, Azərbaycan Milli Elmlər Akademiyasının müxbir üzvü, professor, “İstiqlal” ordeni, bir çox ölkələrin orden və medalları ilə təltif edilmiş bəstəkar Arif Məlikovdur. Onun “Məhəbbət əfsanəsi”, “İki nəfər”, “İki qəlbin dastanı” baletləri dünyanın 70-dən artıq teatrında səhnə təcəssümünü tapmış, əsərləri bir çox konsert salonlarında səslənmişdir.
Azərbaycan Rəssamlar İttifaqının katibi Ağəli İbrahimov, Bəstəkarlar İttifaqının katibi Ramiz Zöhrabov, Azərbaycan Mədəniyyətinin Dostları Fondu sədrinin köməkçisi İbrahim Quliyev, Türkiyənin ölkəmizdəki səfiri Əhməd Ünal Çeviköz bəstəkarı fərdi sərgisinin açılışı münasibətilə təbrik edərək, bu hadisənin respublikamızın mədəni həyatında qeyri-adiliyini vurğuladılar.
Arif Məlikov onun sevincinə şərik olmağa gələnlərə minnətdarlığını bildirdi, rəssamlıqla uşaqlıq çağlarından, hətta musiqiyə meyl göstərməzdən əvvəl məşğul olduğunu söylədi. Sonralar musiqi üstün gəlsə də, rəssamlıq bütün ömrü boyu məhəbbəti və cəlbedici məşğuliyyəti olaraq qaldığını bildirdi.
Ekspozisiyaya 40 əsər daxildir. Müxtəlif illərdə çəkilən bu əsərlər ülvi poetik hisslər doğurur, onlardan sanki gözəl musiqi süzülüb gəlir. İndi onların bir çoxu müxtəlif ölkələrin muzeylərində, Arif Məlikovun dostlarının şəxsi kolleksiyalarında saxlanılır. Bu əsərləri onlara müəllif özü bağışlamışdır.
Bəstəkar-rəssamın sərgiyə baxmağa gələnlərlə görüşü səmimi və sərbəst xarakter daşıyırdı. Bu, müəllifin öz tamaşaçıları və dinləyiciləri ilə, rəyini həmişə qiymətləndirdiyi xalqla, sənət sərrafları ilə görüş idi. O, bir çox görkəmli insanlarla böyük dostluğundan danışaraq, dedi ki, onların arasında rəssamlar da, alimlər, yazıçılar, kinematoqrafçılar da var. Onlardan biri də tanınmış türk xeyriyyəçisi, ölkəmizin sadiq dostu professor İhsan Doğramacıdır. O söylədi ki, Yeddinci simfoniyasını Doğramacının sifarişi ilə bəstələmişdir, Doğramacı isə xüsusi olaraq Arif Məlikovun simfoniyasının ifası üçün 11 ayda Konsert sarayı tikdirmişdir. Arif Məlikovun gözoxşar boyalarla çəkdiyi və sanki musiqi aşılanmış “Badam budağı” əsəri artıq neçə illərdir İ.Doğramacının kabinetini bəzəyir.
Arif Məlikovun Səkkizinci simfoniyası ümummilli liderimiz Heydər Əliyevin nurlu xatirəsinə həsr olunmuşdur. Əsər sentyabrın 11-də Azərbaycan Dövlət Filarmoniyasında bəstəkarın müəllif konsertində səslənəcəkdir.
Sərgidə nümayiş etdirilən əsərlər mövzusuna və ifadə formasına görə rəngarəngdir. Müəllif dedi ki, bu əsərlərdə o, öz duyğu və ovqatını ifadə etmişdir – “Badamın çiçəkləməsi”, “Badam budağı” – mavi və çəhrayı musiqidir, “Üçhissəli simfoniya” – coşğun boyaların mozaikasıdır, “Təəssürat” və “Fantaziya” əsərlərinin qara və qırmızı rəngləri isə kədər və təşviş hisslərinin ifadəsidir. “Xəzərin qara qızılı” silsiləsindən olan əsərləri və dostu Səttar Bəhlulzadənin böyük hörmət və məhəbbətlə çəkdiyi portretini də xüsusi vurğulamaq lazımdır.
Arif Məlikov bəstəkar və rəssam kimi səmərəli işləyir və inanırıq ki, öz pərəstişkarlarını hələ çox sevindirəcəkdir.
Bölmənin digər xəbərləri
