RESPUBLİKA AĞSAQQALLAR ŞURASININ İCLASI KEÇİRİLMİŞDİR
İdarə heyətinin sədri, akademik Budaq Budaqov gündəlik məsələyə keçməzdən əvvəl dövlətimizin başçısı İlham Əliyevin alimlərimizin və tələbələrimizin maddi vəziyyətlərinin yaxşılaşdırılmasını nəzərdə tutan sərəncamlarının əhəmiyyətini xüsusi vurğulamışdır. Bunu elmimizin inkişafına, elm adamlarına yüksək diqqət və qayğının təzahürü kimi dəyərləndirmişdir.
Gündəlikdə duran məsələ ilə əlaqədar Səhiyyə Nazirliyinin sanitariya-gigiyena mərkəzi direktorunun müavini Fariz Babayevin məruzəsi dinlənildi. Məruzədə qeyd olunmuşdur ki, Kür çayının daşması ilə bağlı adı çəkilən rayonlarda su gölməçələrinin sayı təxminən 4 dəfə artmış, kanalizasiya xətləri dağıldığından çirkab içməli sulara qarışmışdır. Belə vəziyyət malyariya və başqa keçici xəsəliklərin yaranmasına və yayılmasına səbəb ola bilər. Bunu nəzərə alaraq Səhiyyə Nazirliyi həmin rayonlara mütəxəssislər ezam etmiş, adı çəkilən bölgələrdə 20-dən artıq xüsusiləşdirilmiş mərkəz yaradılmışdır.
Bu işdə “Sərhədsiz Həkimlər”, YUNİSEF kimi hümanitar təşkilatların da yaxından iştirak etdiyini vurğulayan natiq bildirmişdir ki, bununla əlaqədar 300-hektara yaxın ərazidə durğun su gölləri qurudulmuş və yaxud zərərsizləşdirilmiş, ərazidəki sakinlər ciddi müayinə olunmuşlar.
Məruzə ətrafında çıxışlarda bildirilmişdir ki, həyata keçirilən tədbirlərə baxmayaraq həmin bölgələrdə keçici xəstəliklərin yaranması və yayılması ehtimalı hələ də qalmaqdadır. Bu məsələni bir an da diqqətdən kənarda qoymaq olmaz.
Budaq Budaqov iclasa yekun vuraraq, Ağsaqqallar Şurasının fəaliyyətinin gücləndirilməsinin, rayon şöbələri ilə əlaqələrin möhkəmləndirilməsinin, respublikanın ictimai həyatında daha fəal iştirakın vacibliyini vurğulamışdır.
