Respublika Gənclər Kitabxanasında Ulu Öndərin anım günü ilə əlaqədar silsilə materiallar hazırlanıb
Bakı, 12 dekabr, AZƏRTAC
Dekabrın 12-də müstəqil Azərbaycan dövlətinin memarı və qurucusu, dahi şəxsiyyət, azərbaycançılıq məfkurəsinin banisi, dünya səviyyəli siyasi xadim, bütün ömrü Vətənə və xalqa xidmət, fədakarlıq nümunəsi olan xalqımızın Ümummilli Lideri Heydər Əliyevin anım günüdür. Respublika Gənclər Kitabxanasında Ümummilli Lider Heydər Əliyevin anım günü ilə bağlı dahi liderin həyat və fəaliyyətinə həsr olunmuş maraqlı və məlumatlandırıcı virtual kitab sərgisi və ingilis dilində videomaterial hazırlanıb.
Kitabxanadan AZƏRTAC-a bildirilib ki, virtual kitab sərgisində dünyaşöhrətli siyasətçi Heydər Əliyevin gənclik illərindən, siyasət və hakimiyyət arenasına gəlişindən, müstəqil Azərbaycanın quruculuğu sahəsində olan misilsiz fəaliyyətindən bəhs edilir. Hazırlanan materiallarda Ümummilli Liderin səs yazıları, foto və videogörüntüləri yayımlanır. Kitabxananın əməkdaşları tərəfindən hazırlanan virtual sərgidə Ulu Öndərin həyat və fəaliyyətinə həsr edilən “Bir millət, iki şəxsiyyət”, “Qələbəyə aparan yol”, “Heydər Əliyev irsi - əbədiyaşar təlim”, “Heydər Əliyev siyasəti tarixdə və günümüzdə” kimi kitablar və onların qısa annotasiyaları sərgilənir.
Ümummilli Liderə həsr edilən və ingilis dilində hazırlanan videomaterialda isə Azərbaycan Liderinin ictimai-siyasi fəaliyyətinə, müstəqil Azərbaycanın quruculuğu sahəsində olan misilsiz xidmətlərinə önəm verilir. Burada Ulu Öndər Heydər Əliyevin çoxşaxəli fəaliyyətində özünəməxsus yerə malik olan təhsilin, ədəbiyyatın, mədəniyyətin, gənclər siyasətinin, kitabxana işinin, mütaliə, kitab, həmçinin kitabxanalara göstərilən qayğı, kitab və kitabxana mədəniyyətinin inkişafına verdiyi töhfələr haqqında geniş məlumat verilir.
Bundan əlavə, Respublika Gənclər Kitabxanasının rəsmi saytında “Tarix yaradan şəxsiyyət - Heydər Əliyev 100” layihəsi çərçivəsində “Heydər Əliyev - 100” adlı bölmə yaradılıb. Burada ölkədə fəaliyyət göstərən “müxtəlif mətbuat orqanlarında Ulu Öndər Heydər Əliyev haqqında dərc edilən məqalələr toplanılır. İstifadəçilər burada məqalələrin tam mətni ilə tanış olmaq, onlardan yararlanmaq imkanına malikdirlər. Ulu Öndərin 100 illik yubileyi ilə əlaqədar olaraq toplanan məqalələrin sayı 100-ü üstələyir.
Sözügedən materiallar Respublika Gənclər Kitabxanasının rəsmi saytında yerləşdirilib.
Bölmənin digər xəbərləri
