Respublikamızın qərb bölgəsində Xocalı soyqırımı qurbanlarının xatirəsi dərin hüznlə anılıb
Gəncə, 26 fevral, Rauf Hacıyev, AZƏRTAC
Xocalı faciəsi Azərbaycan xalqının heç vaxt unudulmayacaq və ibrət dərsi götürüləcək qan yaddaşıdır. Xocalı soyqırımının tanınması ilə bağlı əldə olunan təqdirəlayiq nəticələr onu deməyə əsas verir ki, bu faciəni törədənlər gec-tez ədalət mühakiməsi qarşısına çıxacaq, öz dəhşətli cinayətlərinə görə cavab verməli olacaqlar.
AZƏRTAC xəbər verir ki, bu fikirlər Daşkəsən rayonunda Xocalı faciəsi qurbanlarının xatirəsinə həsr edilmiş yığıncaqda səsləndirib.
Tədbirdə çıxış edən Daşkəsən Rayon İcra Hakimiyyətinin başçısı Əhəd Abıyev bildirib ki, azərbaycanlılara qarşı erməni siyasi dairələrinin XIX-XX əsrlərdə mərhələ-mərhələ həyata keçirdiyi etnik təmizləmə siyasətinin tərkib hissəsi olan Xocalı soyqırımı haqqında həqiqətlər dövlətimiz, eləcə də xarici ölkələrdə fəaliyyət göstərən Azərbaycan diasporları tərəfindən dünya ictimaiyyətinə çatdırılır. Prezident İlham Əliyevin apardığı uğurlu xarici siyasət sayəsində hazırda bu proses Azərbaycanın xarici siyasətinin əsas istiqamətlərindən biri kimi müəyyənləşdirilib və Xocalı həqiqətlərinin dünyaya çatdırılması, beynəlxalq aləmdə yayılması, eləcə də bu soyqırımı aktına obyektiv qiymət verilməsi istiqamətində davamlı iş aparılır. Amerika Birləşmiş Ştatlarında Xocalı soyqırımını tanıyan və pisləyən ştatların, həmçinin digər dövlətlərin sayı ildən-ilə artır.
Bildirilib ki, Xocalı həqiqətlərinin dünya ictimaiyyətinə çatdırılması hər bir azərbaycanlının borcudur. Heydər Əliyev Fondunun vitse-prezidenti Leyla Əliyevanın təşəbbüsü ilə “Xocalıya ədalət!” beynəlxalq kampaniyası bu həqiqətlərin dünya ictimaiyyətinə çatdırılmasında mühüm rol oynayır.
X X X
Gədəbəy Rayon İcra Hakimiyyətində Xocalı soyqırımının anım günü münasibətilə tədbir keçirilib.
AZƏRTAC xəbər verir ki, tədbirdə rayon rəhbərliyi, hüquq mühafizə orqanlarının, həmçinin idarə və müəssisələrin əməkdaşları, ictimaiyyət nümayəndələri iştirak ediblər.
Əvvəlcə Xocalı şəhərində baş vermiş soyqırımında dünyasını dəyişən həmvətənlərimizin xatirəsi bir dəqiqəlik sükutla yad olunub.
Tədbirdə Xocalıda baş vermiş qətliamda törədilən ağır cinayətlərdən və erməni vəhşiliyi nəticəsində xüsusi amansızlıqla qətlə yetirilən Xocalı sakinlərinin başlarına gətirilən müsibətlərdən danışılıb.
X X X
Xocalı faciəsi qurbanlarının xatirəsi Naftalan şəhərində də anılıb.
AZƏRTAC xəbər verir ki, bu münasibətlə keçirilən tədbirdə şəhər rəhbərliyi, hüquq mühafizə orqanlarının əməkdaşları, səhiyyə və təhsil işçiləri, həmçinin ictimaiyyət nümayəndələri iştirak ediblər.
Naftalanlılar Azərbaycan Respublikasının azadlığı, suverenliyi və ərazi bütövlüyü uğrunda həlak olanların xatirəsinə ucaldılmış abidə kompleksi önünə gül-çiçək dəstəsi düzüb, faciə qurbanlarının xatirəsini böyük ehtiramla anıblar.
X X X
Bəşəriyyət XX əsrdə bir çox müdhiş soyqırımı və etnik təmizləmə cinayətlərinin şahidi olub. Xocalı onların içərisində daha dəhşətlisidir. Xocalı soyqırımının təşkilatçıları və icraçıları bəşəriyyətə qarşı ən ağır cinayətlər törətmiş canilər kimi beynəlxalq qanunlar əsasında mühakimə olunmalıdırlar.
AZƏRTAC xəbər verir ki, bu fikirlər Xocalı soyqırımının 24-cü ildönümü münasibətilə YAP Samux Rayon Təşkilatında keçirilən faciə qurbanlarının anım tədbirində səsləndirilib.
Mərasim Xocalı soyqırımına həsr olunmuş filmin nümayişi ilə başlanıb. Daha sonra faciə qurbanlarının xatirəsi bir dəqiqəlik sükutla yad edilib.
Tədbirdə çıxış edən Samux Rayon İcra Hakimiyyətinin başçısı Alı Qocayev bildirib ki, erməni hərbi qüvvələri 1992-ci il fevralın 25-dən 26-na keçən gecə XX əsrin ən dəhşətli və qanlı faciəsini - Xocalı soyqırımını törədiblər. Dağlıq Qarabağda erməni quldur birləşmələri keçmiş sovet ordusuna məxsus 366-cı alayın əsgər və zabitləri ilə birlikdə Xocalı şəhərini yerlə-yeksan edib, dinc əhalini, xüsusilə uşaqları, qadınları, qocaları, ağlasığmaz vəhşiliklə qətlə yetiriblər.
Sonda tədbir iştirakçıları samuxlu şagirdlərin Xocalı soyqırımının 24-cü ildönümünə həsr etdikləri rəsm əsərlərinin sərgisinə baxış keçiriblər.
Bölmənin digər xəbərləri
