Riqa, 9 may, AZƏRTAC

Ümummilli lider Heydər Əliyevin anadan olmasının 95 illik yubileyi münasibətilə Azərbaycanın Latviyadakı səfirliyində konfrans keçirilib. “Heydər Əliyev irsi və Azərbaycanın inkişafı” mövzusunda konfransda bu ölkə ictimaiyyətinin tanınmış nümayəndələri, o cümlədən siyasət, elm və mədəniyyət xadimləri, media nümayəndələri və diplomatik korpusun təmsilçiləri iştirak ediblər.

AZƏRTAC xəbər verir ki, tədbirdə əvvəlcə Ulu Öndərin mənalı həyatı və çoxşaxəli siyasi fəaliyyətinə həsr edilmiş “Heydər Əliyev, qalibin yolu” sənədli filmi nümayiş olunub.

Azərbaycanın Latviyadakı səfiri Cavanşir Axundov tədbirdə çıxış edərək ulu öndər Heydər Əliyevin həyat və fəaliyyətindən, Vətən və xalq qarşısında tarixi xidmətlərindən danışıb. Ümummilli lider Heydər Əliyevin hələ sovet dövründə Azərbaycana rəhbərliyi illərində ölkəmizi ən qabaqcıl respublikalar sırasına çıxardığını qeyd edən C.Axundov bu dönəmdə Azərbaycanda iqtisadiyyat, elm, təhsil, mədəniyyət, səhiyyə, inşaat və digər sahələrdə böyük tərəqqinin baş verdiyini diqqətə çatdırıb. Həmin illərdə ölkəmizdə qurulan böyük sənaye-istehsal müəssisələrinin bu gün də öz bəhrəsini verdiyini qeyd edən diplomat bütün bunların Heydər Əliyevin Azərbaycan xalqının gələcəyinə hesablanmış uzaqgörən siyasətinin nəticəsi olduğunu bildirib. Dahi şəxsiyyətin təşəbbüsü və ağır zəhməti ilə Bakıda Cəmşid Naxçıvanski adına hərbi məktəbin açılmasının həmin dövr üçün çox cəsarətli addım olduğunu qeyd edən səfir sonradan bu məktəbin məzunlarının müstəqil Azərbaycanın ordu quruculuğunda böyük rol oynadıqlarını diqqətə çatdırıb.

Elm, təhsil, mədəniyyət sahələrində əldə edilmiş nailiyyətlərdən bəhs edən C.Axundov ulu öndər Heydər Əliyevin Azərbaycan dilinin və ədəbiyyatının inkişafında böyük xidmətlərini vurğulayıb, bu baxımdan 1978-ci ildə Azərbaycan SSRİ-nin Konstitusiyasında Azərbaycan dilinin dövlət dili kimi qəbul edilməsində əbədiyaşar liderin əvəzsiz rol oynadığını bildirib.

Böyük idarəçilik qabiliyyətinə, zəngin biliyə və təcrübəyə sahib Heydər Əliyevin xidmətlərinin o zaman Sovet İttifaqı rəhbərliyində yüksək qiymətləndirildiyini və dahi şəxsiyyətin ittifaq rəhbərliyinə gətirildiyini qeyd edən səfir sonradan SSRİ-nin rəhbəri Mixail Qarbaçovun Heydər Əliyevə və Azərbaycan xalqına qarşı yürüdüyü qərəzli siyasətə etiraz əlaməti olaraq Ulu Öndərin 1987-ci ildə Siyasi Büro üzvlüyündən və SSRİ Nazirlər Soveti sədrinin birinci müavini vəzifəsindən öz ərizəsi ilə istefa verdiyini bildirib. Heydər Əliyevin 20 Yanvar faciəsinin ertəsi günü Azərbaycanın Moskvadakı daimi nümayəndəliyinə gələrək xalqımıza qarşı törədilmiş cinayətin təşkilatçılarının və icraçılarının cəzalandırılmasını tələb etdiyini xatırladan səfir onun Dağlıq Qarabağda yaranmış kəskin münaqişəli vəziyyətlə bağlı SSRİ rəhbərliyinin ikiüzlü siyasətinə etiraz əlaməti olaraq, 1991-ci ilin iyulunda Sovet İttifaqı Kommunist Partiyasının sıralarını tərk etdiyini diqqətə çatdırıb. Ermənistan-Azərbaycan, Dağlıq Qarabağ münaqişəsinin məhz Heydər Əliyevin sovet rəhbərliyindən istefasından dərhal sonra başlandığını qeyd edən diplomat Ümummilli Liderin SSRİ-də vəzifədə olarkən ermənilərin uzun illər planlaşdırdığı bu çirkin cəhdlərinin qarşısını dəfələrlə aldığını bildirib.

Azərbaycanın dövlət müstəqilliyinin əvvəllərində məruz qaldığı ağır iqtisadi tənəzzül və müharibə illərində Heydər Əliyevin xalqın çağırışı ilə hakimiyyətə qayıdaraq ölkəmizi məhv olmaq təhlükəsindən xilas etdiyini qeyd edən C.Axundov bu gün müstəqil və çiçəklənən Azərbaycanın Heydər Əliyevin əmanəti olduğunu söyləyib. Bu ağır illərdə işğalçı Ermənistanla atəşkəsə nail olaraq, ölkədə ictimai-siyasi sabitliyin, milli birliyin və həmrəyliyin bərqərar olunmasında Heydər Əliyevin xidmətlərinin əvəzsiz olduğunu qeyd edən səfir dahi şəxsiyyətin reallaşdırdığı genişmiqyaslı iqtisadi islahatlar, müstəqil enerji siyasəti, ordu quruculuğu, Konstitusiyanın qəbulu və digər demokratik islahatların bu gün də öz bəhrəsini verdiyini söyləyib.

Əsası ümummilli lider Heydər Əliyev tərəfindən qoyulmuş neft strategiyasının bu gün uğurla reallaşdırıldığını qeyd edən səfir bunun ölkəmizin neft gəlirlərinin artması ilə nəticələndiyini bildirib. Qeyd edib ki, neftdən əldə olunan maliyyə resursları əhalinin sosial rifahının yüksəldilməsinə və ölkədə sürətli iqtisadi artımın maliyyələşdirilməsinə geniş imkanlar açıb. Son on il ərzində Azərbaycan dünyanın ən yüksək iqtisadi artım tempinə malik ölkələrindən birinə çevrilib. Bu müddətdə ölkədə həyata keçirilən iqtisadi siyasət ümumi daxili məhsulun nominal həcminin və əhalinin real gəlirlərinin 6-7 dəfə artmasına, yoxsulluğun səviyyəsinin 5 faizdən də aşağı düşməsinə səbəb olub. Nəticədə əhalinin sosial rifahı dəfələrlə yüksəlib.

Azərbaycanın birbaşa iştirakı və təşəbbüsü ilə həyata keçirilən qlobal enerji, nəqliyyat və infrastruktur layihələrindən danışan səfir Cənub Qaz Dəhlizi, Şərq-Qərb və Şimal-Cənub nəqliyyat dəhlizləri, habelə Azərbaycanda qurulan müasir nəqliyyat-logistika infrastrukturu barədə ətraflı məlumat verib. Bu gün Azərbaycanın Avroasiya məkanının etibarlı enerji və ticarət tərəfdaşına çevrildiyi və bütün bunların vaxtilə Heydər Əliyevin əsasını qoyduğu çoxşaxəli xarici iqtisadi siyasətin nəticəsi olduğu bildirilib.

Latviyanın sabiq prezidenti Valdis Zatlers ulu öndər Heydər Əliyevin Azərbaycan xalqı qarşısında xidmətlərinin əvəzsiz olduğunu diqqətə çatdırıb. O, Heydər Əliyevin təkcə müasir müstəqil Azərbaycanın qurucusu deyil, həm də ölkədəki böyük iqtisadi inkişafın təməlini qoyan fenomenal şəxsiyyət olduğunu deyib. Heydər Əliyev ilə şəxsən tanış olmasından və bu gün onun qurduğu Azərbaycanda müşahidə edilən böyük inkişafdan məmnunluğunu ifadə edən Valdis Zatlers Azərbaycan xalqına sülh, tərəqqi və rifah arzulayıb.

Latviyalı tanınmış yazıçı Yanis Udris ulu öndər Heydər Əliyev haqqında nümayiş etdirilən filmdən təsirləndiyini vurğulayaraq dahi şəxsiyyətin dünya miqyaslı siyasətçi və lider olduğunu söyləyib. Sovet İttifaqının dağıldığı ağır dönəmdə Heydər Əliyev kimi dahi liderin və xilaskarın ölkəmizdə rəhbərliyə qayıdışını “Azərbaycan xalqının bəxtinin gətirməsi” kimi qiymətləndirən yazıçı, Ümummilli Liderin taleyin Azərbaycan xalqına töhfəsi olduğunu bildirib. Heydər Əliyevin yüksək mənəvi keyfiyyətlərindən bəhs edən yazıçı onu zərif təbəssümlü və öz sevgisinə sadiq insan kimi əsl liderə xas nadir cəhətləri özündə birləşdirdiyini söyləyib.

Latviya Prezidentinin milli azlıqlar üzrə müşaviri və “Ocaq” Azərbaycan diaspor cəmiyyətinin sədri Roman Əliyev ulu öndər Heydər Əliyevin böyük lider və fenomenal şəxsiyyət olması ilə yanaşı, onun ən əsası xalqının dəyərli övladı olduğunu bildirib. Ümummilli lider Heydər Əliyevin güclü liderlik, zəngin təcrübə və idarəçilik qabiliyyətlərinə görə Sovet İttifaqı rəhbərliyinə gətirildiyini qeyd edən R.Əliyev böyük şəxsiyyətin elm, təhsil və mədəniyyət sahələrinə yüksək diqqət yetirdiyini, ölkənin tanınmış elm və mədəniyyət xadimlərinə sonsuz qayğı göstərdiyini deyib. Ümummilli lider Heydər Əliyevin anadan olmasının 95 illik yubileyi münasibətilə xalqımızı təbrik edən Roman Əliyev mayın 10-nun Azərbaycan tarixində ən əlamətdar gün olduğunu söyləyib.

Nigar Cəfərli

AZƏRTAC-ın xüsusi müxbiri

Riqa