RUDOLF İVANOV NAXÇIVAN DÖVLƏT UNİVERSİTETİNİN FƏXRİ DOKTORUDUR
Naxçıvan Dövlət Universiteti Elmi şurasının müəllifin kitabına həsr olunmuş xüsusi iclası keçirilmişdir. Milli Məclisin deputatı, yazıçı-publisist Elmira Axundova, universitetin prorektoru Vəli Hüseynov əsəri Azərbaycan hərb tarixində parlaq səhifə kimi dəyərləndirmişlər.
Elmi şuranın qərarı ilə Rudolf İvanova universitetin fəxri doktoru adı verilmişdir.
Rudolf İvanov universitet rəhbərliyinə minnətdarlıq edərək bildirmişdir ki, Naxçıvan xanlığı haqqında yeni kitab yazmaq niyyətindədir.
X X X
Rudolf İvanovun “Bayazidin müdafiəsi: həqiqət və yalan” kitabı AMEA-nın Naxçıvan bölməsində də müzakirə olunmuşdur.
Müzakirədə yazıçı-publisist Elmira Axundova, filologiya elmləri doktoru Əbülfəz Quliyev, tarix elmlər namizədi İlqar Kəngərli, Tarix- Etnoqrafiya və Arxeologiya İnstitutunun elmi işçisi Musa Quliyev bu qiymətli əsəri yüksək qiymətləndirmişlər.
Rudolf İvanov diqqətə və əsər haqqında deyilən xoş sözlərə görə minnətdarlığını bildirmişdir.
Xatırladaq ki, Rusiya Yazıçılar Birliyi və Moskva Jurnalistlər Birliyinin üzvü olan İvanov bu əsərdə 1877-1878-ci illər Rusiya-Türkiyə müharibəsinin mühüm epizodlarından olan Bayazid qalasının müdafiəsində rus zabiti Stokviçin deyil, azərbaycanlı polkovnik İsmayıl xanın rolunu aşkara çıxarmış, bununla da Pikulun “Bayazid” romanının və onun əsasında çəkilmiş filmin uydurma fakta əsaslandığını sübut etmişdir.
İsmayıl xan Naxçıvan hakimi Kəlbalı xanın nəvəsi, Ehcan xanın oğludur. Ehcan xan, oğulları İsmayıl xan və Kəlbalı xan rus ordusunda xidmət etmiş, general rütbəsi almışlar.
