RUS MƏTBUATININ V ÜMUMDÜNYA KONQRESİNİN ÜMUMİ İCLASI
Ümumdünya Rus Mətbuatı Assosiasiyasının prezidenti, İTAR-TASS agentliyinin baş direktoru Vitali İqnatenko iclası açaraq, konqresin işinin yüksək səviyyədə təşkilinə görə Azərbaycan tərəfinə təşəkkür etdi.
RF xarici işlər nazirinin birinci müavini Eleonora Mitrofanova konqresin iştirakçılarını Rusiya XİN adından salamlayaraq dedi ki, bu il Assosiasiyanın 5 ili tamam olmuşdur və ötən dövrdə xeyli iş görülmüşdür. Onun sözlərinə görə, indi rus diasporu üzvlərinin sayına görə dünyada ancaq Çin diasporundan geri qalır. Rusiya dövləti xaricdəki soydaşlarla iş aparılmasına çox böyük önəm verir. Rusiyanın mədəni irsinin qorunub saxlanması və artırılması Assosiasiyanın fəaliyyətində əsas istiqamətlərdən biri olmalıdır.
E.Mitrofanova ölkəsinin xarici siyasət idarəsinin bu sahədə fəaliyyətindən danışaraq bildirdi ki, cari ildə dövlət xaricdəki soydaşlarla iş üçün 7 milyon dollar ayırmış, xüsusi proqramlar qəbul etmişdir. Ümumdünya Rus Mətbuatı Assosiasiyası diasporla aparılan işdə böyük rol oynayır. Rusiyada baş verən ictimai-siyasi hadisələr barədə doğru-düzgün və operativ məlumatı öz oxucularına, ilk növbədə, rusdilli mətbuat çatdırmalıdır.
Sonra Moskva hökumətinin naziri Aleksandr Muzıkantski çıxış edərək, Moskvanın meri Yuri Lujkovun konqres iştirakçılarına təbrik məktubunu oxudu.
İclas iştirakçıları rus mətbuatının dünyada rolunun genişləndirilməsinin, müxtəlif ölkələrin jurnalist kollektivlərinin fəaliyyətinin əlaqələndirilməsinin aktual məsələlərini müzakirə etdilər. Bildirildi ki, Rusiya keçmiş sovet respublikalarında işləyən öz xüsusi müxbirlərinin problemlərinə diqqət yetirmədiyinə görə, bu ölkələrdə informasiya məkanını tədricən itirir.
Konqresin ikinci ümumi iclasında yaxın və uzaq xaricdən olan gənc jurnalistlər üçün stajkeçmələrin və təlim seminarlarının təşkili məsələləri müzakirə edildi.
İclas iştirakçıları rusdilli kütləvi informasiya vasitələri üçün peşəkar kadrlar hazırlanmasının vacibliyini vurğuladılar. İTAR-TASS agentliyinin, Moskva Dövlət Universiteti jurnalistika fakültəsinin və Rusiya Televiziya və Radio Akademiyasının bazasında Moskva şəhərində və RF regionlarından birində rusdilli KİV-lərin gənc jurnalistləri üçün ildə iki dəfə seminarlar keçirmək qərara alındı.
Ümumdünya Rus Mətbuatı Assosiasiyasının prezidenti Vitali İqnatenko bildirdi ki, seminarın keçiriləcəyi vaxt və yer barədə bütün rusdilli KİV-lərin nümayəndələrinə əvvəlcədən məlumat veriləcəkdir. O dedi: “Seminarın iştirakçıları Moskvaya gəldikdən sonra onların bütün xərclərini İTAR-TASS ödəyəcəkdir. Bundan əlavə, gənc jurnalistlərə Rusiyanın ən yaxşı telekanallarında və mətbu orqanlarında üçgünlük staj keçməyə imkan veriləcəkdir”.
Sonda iclas iştirakçıları tədbirin təşkilatçılarına təşəkkür etdilər, ilk növbədə, Ümumdünya konqresinin Bakıda keçirilməsinin təşəbbüskarı olan, Azərbaycan Prezidenti Heydər Əliyevə böyük minnətdarlıqlarını bildirdilər.
Bölmənin digər xəbərləri
