DÜNYA
Rusiya Arktika Şurasından çıxa bilər
![Rusiya Arktika Şurasından çıxa bilər](/files/2023/2/1200x630/16840430354128029621_1200x630.jpg)
Bakı, 14 may, AZƏRTAC
Qərbin destruktiv davranışı və təşkilatın üzvü olan ölkə kimi hüquqlarının pozulması halında Rusiya Arktika Şurasından çıxa bilər.
AZƏRTAC xəbər verir ki, bunu Rusiya Xarici İşlər Nazirliyinin xüsusi tapşırıqlar üzrə səfiri Nikolay Korçunov deyib.
Onun sözlərinə görə, Norveçin sədrliyi zamanı təşkil olunacaq tədbirlərə Rusiya tərəfinin dəvəti məsələsi müzakirə edilməyib: “Rusiya nümayəndələrinin Arktika Şurasının tədbirlərinə dəvət olunmaması onun üzv dövlət kimi hüquqlarının pozulmasıdır və bu halda ölkəmizin bu təşkilatın fəaliyyətində iştirakı mümkün deyil”.
Bundan əvvəl Rusiya 2021-ci ildən 2023-cü ilədək sədrlik etdiyi təşkilata sədrliyi Norveçə verib. "İndi Arktika Şurasının gələcəyi tamamilə Norveçin sədrliyindən və şuranın işinin həmişə əsaslandığı kollektiv yanaşmaların digər üzv ölkələrin dəstəyindən asılıdır", - deyə N.Korçunov sözlərinə əlavə edib.
Diplomat bildirib ki, Moskva Arktika Şurasında öz xəttini vəziyyətin gələcək inkişafından və Rusiyanın maraqlarına hörmət zərurətindən asılı olaraq quracaq.
Qeyd edib ki, Arktika Şurası 1996-cı ildə Kanadanın təşəbbüsü ilə ətraf mühitin mühafizəsi və qütb bölgələrinin davamlı inkişafı sahəsində əməkdaşlıq məqsədilə yaradılıb. Buraya yeddi Arktika ölkəsi daxildir: Rusiya, ABŞ, Danimarka, İslandiya, Norveç, Finlandiya və İsveç.