RUSİYA VƏ AZƏRBAYCAN VƏTƏNDAŞLAR ÜÇÜN VİZASIZ REJİM TƏTBİQ EDİRLƏR
AZƏRTAC “Novosti” agentliyinə istinadla xəbər verir ki, Rusiya hökuməti Azərbaycan hökuməti ilə iki dövlətin vətəndaşlarının vizasız səfərləri haqqında sazişə protokolun layihəsini təsdiqləmişdir.
RF hökumətinin mətbuat xidməti bildirmişdir ki, Rusiya hökumətinin sədri Mixail Fradkov bu barədə müvafiq qərar imzalamışdır.
Protokola görə, iki dövlətin vətəndaşları vizasız rejim üzrə səfərlər edə bilərlər, lakin bu zaman onlarda aşağıdakı sənədlər olmalıdır: RF vətəndaşları üçün - RF vətəndaşının pasportu (xarici pasport), xidməti pasport, diplomatik pasport, dənizçi pasportu, Rusiyaya gəlmək (qayıtmaq) şəhadətnaməsi (ancaq RF-yə qayıtmaq üçün); Azərbaycan vətəndaşları üçün - xarici pasport, xidməti pasport, diplomatik pasport, dənizçi kitabçası və Azərbaycan Respublikasına qayıtmaq şəhadətnaməsi (ancaq Azərbaycan Respublikasına qayıtmaq üçün).
Protokol imzalandıqdan 30 gün sonra müvəqqəti tətbiq ediləcək və tərəflərin lazımi dövlətdaxili prosedurları yerinə yetirdikləri barədə sonuncu yazılı bildirişin alındığı gündən qüvvəyə minəcəkdir.
Qərara əsasən, RF XİN-ə Azərbaycan tərəfi ilə danışıqlar aparmaq və razılaşma əldə edildikdən sonra protokolu hökumətin adından imzalamaq tapşırılır. Lakin bu zaman layihəyə prinsipial xarakter daşımayan dəyişikliklər edilməsinin mümkünlüyü nəzərə alınmalıdır.
Bölmənin digər xəbərləri
