Rusiyalı deputat: Bakı mənə həyata vəsiqə verib
Moskva, 2 may, AZƏRTAC
Anatoli Voronovski “Vahid Rusiya” partiyasından RF Dövlət Dumasının deputatı, parlamentin nəqliyyat və nəqliyyat infrastrukturu Komitəsinin üzvüdür. Bakıda dünyaya gələn siyasətçi hazırda aktiv surətdə beynəlxalq logistikanın inkişafı məsələləri üzərində işləyir, Azərbaycan Respublikası parlamenti ilə əlaqələr üzrə qrupun fəaliyyətində iştirak edir.
Rusiyalı deputat AZƏRTAC-a müsahibəsində RF ilə Azərbaycan Respublikası arasında nəqliyyat əlaqələrinin perspektivlərindən, beynəlxalq dəhlizlərin, xüsusən “Şimal-Cənub” marşrutunun inkişafından bəhs edib, həmçinin iki ölkənin humanitar və parlamentlərarası əlaqələrinin vacibliyini vurğulayıb.
- Anatoli Vladimiroviç, siz Bakıda anadan olmusunuz. Qəlbinizdə doğma şəhərinizlə bağlı hansı xatirələr qalıb?
- Mən Sovet İttifaqında doğulmuş adamam. SSRİ-nin tərkibində olan bütün İttifaq respublikaları mənim vətənim olub və belə olaraq qalır. Mən Bakıda doğulub boya-başa çatmışam, həm orta məktəbdə, həm də S.M. Kirov adına Xəzər Ali Hərbi Dənizçilik Məktəbində təhsil almışam.
Bakı mənə həyata vəsiqə verib. Mənim babam və nənəm orada dəfn olunub və onlarla bağlı çox səmimi xatirələrim var. Müharibədən sonra babamı Xəzər Donanmasına göndərdilər, sonra ağac emalı sexinə rəhbərlik etdi. Azərbaycan mənim ikinci vətənimdir və mən həmişə oraya böyük həyəcan hissi ilə qayıdıram, xüsusən də əcdadlarımın xatirəsini ehtiramla yad edirəm.
– Bu gün Azərbaycan sizin üçün şəxsi hisslər və peşəkar fəaliyyət baxımından nəyi ifadə edir?
– Azərbaycan mənim həyatımda xüsusi yer tutur. Mən bu gün Dövlət Dumasının deputatı kimi Rusiya-Azərbaycan münasibətlərinin inkişafını maraq və hörmətlə izləyirəm. Ölkələrimiz arasında güclü qarşılıqlı anlaşma mövcuddur və mən Bakıda doğulmuş bir insan kimi, bu prosesin bir hissəsi ola bildiyim üçün şadam.
– Siz Milli Məclislə əlaqələr üzrə deputat qrupunun üzvüsünüz. Bu gün bu qrupun üzləşdiyi problemlər hansılardır?
– Əsas vəzifə parlamentlərarası dialoqu inkişaf etdirmək, etimadı gücləndirmək və birgə həll yollarını hazırlamaqdır. Biz müxtəlif sahələrdə - iqtisadiyyatdan tutmuş mədəniyyət və təhsilə qədər qarşılıqlı fəaliyyət göstəririk. Bu, bir-birimizi eşitməyə və konkret təşəbbüsləri irəli sürməyə imkan verən canlı, işlək formatdır.
– Qlobal dəyişikliklər kontekstində “Şimal-Cənub” Beynəlxalq Nəqliyyat Dəhlizi xüsusi əhəmiyyət kəsb edir. Rusiya və Azərbaycan bu layihədə hansı rolu oynayır?
- Bu dəhliz strateji bir arteriyadır. Bu layihədə həm Rusiya, həm də Azərbaycan əsas rol oynayır. Azərbaycan Şimalla Cənub - Rusiya, İran və Körfəz ölkələri arasında logistika əlaqəsini təmin edir. Bu, təkcə nəqliyyat deyil, iqtisadi dayanıqlığın və qarşılıqlı inteqrasiyanın əsasıdır.
– Sizcə, Rusiya ilə Azərbaycan arasında logistika sahəsində əməkdaşlığı hansı əlavə tədbirlər gücləndirə bilər?
– Hesab edirəm ki, dəmir yolu rabitəsini, xüsusən də sərnişin rabitəsini daha fəal inkişaf etdirmək və bərpa etmək lazımdır. Sovet dövründə bu əlaqə yaxşı qurulmuşdu, hazırda həmin rahat marşrutları qaytarmaq lazımdır. Yaxşı olardı ki, Azərbaycan vətəndaşları rahatlıqla bizim kurortlara, bizimkilər isə Bakıya və Azərbaycanın digər şəhərlərinə gələ bilsinlər. Turizm və logistika paralel şəkildə inkişaf etməlidir.
– Bakıya və sizin üçün doğma olan yerlərə yenidən səfər etmək planınız varmı?
- Əlbəttə. Bu yerlər həmişə məni özünə çəkir. Mən dədə-babalarımın məzarlarını ziyarət edirəm, imkan olsa, mütləq yenə gələcəyəm. Bakı mənim həyatımın başlanğıcıdır. Azərbaycana hər səfər mənim üçün sadəcə bir səyahət deyil, həm də özümə qayıdışdır.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
