RUSİYANIN AZƏRBAYCANDAKI SƏFİRLİYİNDƏ RƏSMİ QƏBUL
Azərbaycanın Baş naziri İlham Əliyev qəbulda iştirak edirdi. Qəbulun iştirakçıları ölkəmizin hökumətinin başçısını alqışlarla qarşıladılar.
Rusiya Federasiyasının ölkəmizdəki fövqəladə və səlahiyyətli səfiri Nikolay Riyabov rəsmi qəbulu açaraq, Azərbaycanın Baş naziri İlham Əliyevin Sankt-Peterburqun 300 illiyi şərəfinə medalla təltif olunması haqqında Rusiya Prezidenti Vladimir Putinin fərmanını oxudu.
Rusiya Təhlükəsizlik Şurasının katibi VLADİMİR RUŞAYLO medalı Azərbaycanın Baş nazirinə təqdim edərək dedi:
- Hörmətli İlham Heydəroviç! Mən Rusiya Federasiyasının Prezidenti Vladimir Vladimiroviç Putinin tapşırığını yerinə yetirmək və Sankt-Peterburqun 300 illiyi şərəfinə medalı Sizə təqdim etmək istəyirəm.
Sonra Azərbaycan hökumətinin başçısı İLHAM ƏLİYEV çıxış edərək dedi:
- Bu medalla təltif olunmaq mənim üçün böyük şərəfdir. Xüsusən ona görə ki, bu medal mənə hörmətli Prezident Vladimir Vladimiroviç Putinin fərmanı ilə təqdim edilir. Bu, ölkələrimiz arasında münasibətlərin necə dostluq, qardaşlıq xarakteri daşıdığını, talenin hökmü ilə ölkələrimizə rəhbərlik edən şəxslərin bir ümumi arzusunun - əməkdaşlığımızı möhkəmlətmək, Rusiya ilə Azərbaycan arasında, rus və Azərbaycan xalqları arasında dostluğu, qardaşlığı inkişaf etdirmək arzusunun olduğunu bir daha nəzərə çarpdırır.
Mən bu medalı çox yüksək qiymətləndirirəm və sizi əmin etmək istəyirəm ki, biz öz tərəfimizdən, - bu gün sizinlə bu barədə danışdıq, - var qüvvə ilə çalışacağıq ki, ölkələrimiz daha da yaxınlaşsın, aramızdakı münasibətlər daha yaxşı olsun. Hərçənd, zənnimcə, bundan da yaxşı ola bilməz, lakin, buna baxmayaraq, biz çalışacağıq.
Sizə bir daha təşəkkür edirəm.
X X X
Qəbulda Milli Məclisin sədri Murtuz Ələsgərov, Prezidentin İcra Aparatının rəhbəri Ramiz Mehdiyev, parlament sədrinin və baş nazirin müavinləri, xarici ölkələrin səfirləri, digər rəsmi şəxslər iştirak edirdilər.
Bölmənin digər xəbərləri
