RUSİYANIN ƏN MÜHÜM VƏZİFƏSİ DÖVLƏTİN BİRLİYİNİ TƏMİN ETMƏKDİR
Rusiya Prezidenti bir sıra mühüm bəyanatlar vermiş, hakimiyyətin idarə olunması sisteminin təkmilləşdirilməsinə dair konkret təkliflər irəli sürmüşdür. O bildirmişdir ki, hazırda ən mühüm vəzifələr dövlətin birliyini təmin etmək, dövlət strukturlarını möhkəmlətmək, iqtidara etimadı yüksəltməkdir. Dövlətin və hakimiyyətin birliyinin təmin olunması üçün icra hakimiyyəti orqanlarının formalaşdırılmasında Federasiya və onun subyektləri birlikdə iştirak etməlidirlər. Dövlət başçısının fikrincə, belə birlik vətəndaşların və ölkənin təhlükəsizliyini təmin etməyin əsas şərtidir.
Prezident Vladimir Putin demişdir ki, hakimiyyət vertikalının vəhdəti həm də terrorizmlə səmərəli mübarizə naminə təmin olunmalıdır. Bu, ümumdövlət vəzifəsidir. Onun yerinə yetirilməsi üçün bütün ehtiyatlar səfərbər olunmalıdır. Güc strukturlarına terrorizmlə mübarizəyə yönəldilmiş tədbirləri gücləndirmək, xüsusi xidmət idarələrinin xətti ilə beynəlxalq əməkdaşlığı genişləndirmək əmri verilmişdir. Rusiyada elə bir sistem olmalıdır ki, o, nəinki terror aktlarının qarşısını alacaq, həm də onları qabaqlamalı, cinayətkarları yuvasındaca məhv etməli, lazım gələrsə, onları xaricdə yaxalayaraq, ölkəyə gətirməlidir. Rusiya Prezidenti vurğulamışdır ki, terrorizm yuvası olan ekstremist təşkilatlar qadağan edilməli, onların liderləri isə qanuna müvafiq surətdə cəzalandırılmalıdır.
Rusiya rəhbəri dövlət aparatının, o cümlədən hüquq mühafizə orqanlarının və xüsusi idarələrin fəaliyyətinə cəmiyyət tərəfindən nəzarət üçün ictimai palata yaradılmasının zəruriliyindən də danışmışdır.
