Şahbuz, 13 fevral (AZƏRTAC). Naxçıvan Muxtar Respublikasının Ermənistanla sərhəddə yerləşən yaşayış məntəqələrindən biri də Şahbuz rayon mərkəzindən 22 kilometr məsafədə düşmənlə üz-üzə dayanan Şada kəndidir.

Kəndin sakinləri 1990-cı ildə Ermənistanın bu istiqamətdə hərbi təcavüzü zamanı yurdun müdafiəsinə qalxmış, düşmənə qarşı igidliklə vuruşmuşlar. Kənd şəhid vermiş, lakin təpədən dırnağadək silahlanmış yağı düşməni geri oturtmağı bacarmışdır.

Artıq o günlər arxada qalmışdır. Bu gün Şada inkişaf edir və xoş günlərini yaşayır. Şadanın yolu o qədər abaddır ki, hərdən adam bu yolla hərəkət edərkən dağ kəndinə getdiyini unudur.

Kəndin ümumi ərazisi 1300 hektardır. Şadanın 182 nəfər sakini 57 təsərrüfatda birləşmişdir. Burada insanlar mövcud əlverişli imkanlardan səmərəli istifadə edərək həm əkin-biçinlə məşğul olur, həm də heyvandarlığı inkişaf etdirirlər. Bu gün Şadada 338 baş mal-qara, 1.714 baş qoyun-keçi bəslənilir. Kənddə baytarlıq xidməti yüksək səviyyədədir. Sakinlər daxili bazarın ət və süd məhsullarına olan tələbatını ödəmək üçün ildən-ilə təsərrüfatlarını böyüdür, heyvanların baş sayını artırırlar.

Kənddə həmsöhbət olduğumuz Vaqif Məmmədov, Qurban Məmmədov, Əli Səfərov hərəyə 70-80 arı ailəsi saxlayır. Onlar dağların min bir çiçəyindən toplanmış, kəklikotu qoxulu təmiz balı ölkənin müxtəlif bölgələrindəki alıcılarına çatdırırlar.

Şadaya gedən yolun sağ və sol tərəflərindəki əkin sahələri kəndə gələrkən diqqətimi çəkmişdi. 2009-cu ildə 28 hektar sahədən bol məhsul götürən istehsalçılar özlərinin illik un ehtiyatlarını tədarük edə bilmişlər. Onlar 2010-cu ilin məhsulu üçün 29,5 hektar sahədə payızlıq taxıl əkmişlər.

Kənddə 2008-ci ilin sentyabrında əkinçiliyi inkişaf etdirmək üçün yeni su xətti istifadəyə verilmişdir. Ərazidəki təbii bulaqların suyu çənə yığılır, nasoslar vasitəsilə kəndin yuxarı hissəsinə vurulur və buradan həyətlərə paylanır. Həmin su xətti kəndin içməli və suvarma suyuna olan tələbatını ödəyir.

Ötən il Şadada bir sıra sosial xidmət obyektləri istifadəyə verilmişdir. Onlardan biri müasir layihə əsasında inşa edilmiş kənd mərkəzidir. Əvvəllər adi bir məsələnin həlli ilə bağlı rayon mərkəzinə, ya da Naxçıvan şəhərinə üz tutan şadalılara indi kənd mərkəzində bu problemləri həll etmək üçün hər cür şərait yaradılmışdır.

Yeni binada icra nümayəndəliyi, kitabxana, 54 yerlik klub, kənd bələdiyyəsi, Yeni Azərbaycan Partiyasının ərazi ilk təşkilatı, ATS, polis və baytar məntəqələri fəaliyyət göstərir. Bütün bunlar sərhəd yaşayış məntəqəsinin sakinlərinə üzləşdikləri problemləri yerindəcə həll etmək imkanı vermişdir. 2008-ci ildə istifadəyə verilmiş tibb məntəqəsində xəstələrə ilkin tibbi yardım göstərilməsi üçün hər cür şərait yaradılmışdır.

Şada kənd orta məktəbi üçün də yeni bina inşa olunmuşdur. İkimərtəbəli məktəbin işıqlı, geniş sinif otaqları, kompyuter, hərbi hazırlıq kabinələri, idman zalı vardır. Tədrisin keyfiyyətini yüksəltmək məqsədi ilə 2009-cu ildə məktəbə elektron lövhə də hədiyyə edilmişdir.

Şada kəndi ərazisində yerləşən “N” saylı hərbi hissənin maddi bazası ildən-ilə daha da gücləndirilir. 2009-cu ildə həmin hərbi hissənin şəxsi heyəti üçün əsgər yataqxanası və 8 mənzilli, ikimərtəbəli zabitlər evi tikilib istifadəiə verilmişdir. Hər iki yeni obyekt qazlaşdırılmış, işıq xətti çəkilmiş, yaşayış üçün yüksək şərait yaradılmışdır. Bu isə sərhədimizin daha etibarlı qorunması imkanlarını artırır.

Dəniz səviyyəsindən 1500-2000 metr yüksəklikdə yerləşən Şadanın bugünkü mənzərəsi sərhəd kəndinə göstərilən dövlət qayğısının ifadəsidir. Şadalılar bu qayğıdan ruhlanaraq torpaqlarını qoruyur və hər qarışını əkib becərirlər. Bir sözlə, Şada gündən-günə çiçəklənir, müasir, inkişaf etmiş Azərbaycan kəndinin nümunəsinə çevrilir. Bu gün həmin kənd iki addımlıqda yerləşən düşmən üçün göz dağıdır.

######