Şahin Bağırov: Voleybol üzrə hər iki yığmanın baş məşqçilərinə inanırıq
Bakı, 29 fevral, AZƏRTAC
Artıq həm kişi, həm də qadın milli komandalarının baş məşqçilərinin proqramları qəbul olunub. Sənəddə onların görəcəkləri işlərlə bağlı məlumatlar var.
Bu sözləri AZƏRTAC-a açıqlamasında Azərbaycan Voleybol Federasiyasının prezidenti Şahin Bağırov deyib.
O bildirib ki, qəbul olunan hesabatlar nəticəsində hər iki milli komanda müəyyən hədəflərə çatacaq: “Biz həm qadınlardan ibarət yığmanın baş məşqçisi Faiq Qarayevə, həm də kişi voleybolçulardan ibarət yığmaya yeni təyin olunan baş məşqçi Fərid Cəlalova inanırıq. Hər iki mütəxəssis kifayət qədər təcrübəlidir. İndi onlar komandanın təlim-məşq toplanışını, oyunçuların fiziki və psixoloji hazırlıqlarını müstəqil şəkildə həyata keçirəcəklər. Qızıl Avropa Liqasında uğurlu olacağımıza inanırıq. Hədəf reytinq cədvəlində yuxarı pillələrdə olmaqdır”.
Ş.Bağırov Azərbaycan millisi üçün gənc istedadlı oyunçuların yetişdirilməsi üzrə işlərin aparıldığını da qeyd edib: “Artıq biz regionlarda istedadlı oyunçuları seçirik. Azərbaycan voleybolunun gələcəyi naminə əlimizdən gələni edəcəyik”.
Bölmənin digər xəbərləri
