Şahin Seyidzadə: Ulu Öndər Azərbaycanın memarlıq irsinin qorunmasına xüsusi diqqət yetirirdi
Şuşa, 24 noyabr, Səadət Hakıyeva, AZƏRTAC
Bu il 100 illik yubileyini qeyd etdiyimiz Ulu Öndər Heydər Əliyev bütün sahələr kimi, tarixi abidələrin, Azərbaycanın memarlıq irsinin qorunub saxlanılmasına xüsusi diqqət yetirirdi.
AZƏRTAC xəbər verir ki, bu sözləri “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Şahin Seyidzadə noyabrın 24-də Şuşada keçirilən Türk dünyası memarlarının simpoziumunun açılış mərasimində çıxışında deyib.
İçərişəhərə dövlət qoruğu statusunun Ulu Öndər tərəfindən 1977-ci ildə verildiyini xatırladan Ş.Seyidzadə qoruğun 21 hektardan çox ərazini əhatə etdiyini bildirib. O qeyd edib ki, qoruğun yaşayış fondunun 85 faizi abidələrdən ibarətdir.
Tarixi memarlıq irsinin qorunmasının vacibliyinə diqqət çəkən Ş.Seyidzadə bu məqsədlə qoruqda “Gənc bərpaçılar məktəbi”nin yaradıldığını bildirib. Onun sözlərinə görə, burada məqsəd müxtəlif ölkələrlə təcrübə mübadiləsi aparmaqdır.
“Düşünürəm ki, simpozium həm təcrübə mübadiləsi, həm də Türk memarlığının inkişafına öz töhfəsini verəcək”, - deyə Şahin Seyidzadə vurğulayıb.
Bölmənin digər xəbərləri
