SAMUX RAYONUNUN 13 YAŞI TAMAM OLMUŞDUR
AZƏRTAC-ın müxbiri xəbər verir ki, samuxlular rayonun yaradılmasının ildönümünü yaddaqalan tədbirlərlə qeyd etmişlər. Bu münasibətlə keçirilmiş ümumrayon iməciliyində iştirak edən minlərlə sakin rayon mərkəzində, kənd və qəsəbələrdə on minə yaxın ağac əkmiş, küçə və meydanlarda təmizlik və abadlıq işləri görmüşlər. Rayonun idarə və müəssisələrində, təhsil, səhiyyə, mədəniyyət ocaqlarında səliqə-sahman yaradılmışdır.
Rayon mərkəzində gündə 24 ton çörək bişirən yeni kombinat işə salınmışdır. Bu münasibətlə keçirilən mərasimdə rayon icra hakimiyyətinin başçısı Şahin Məmmədov çıxış edərək, kombinatın istifadəyə verilməsini regionların sosial-iqtisadi inkişafı Dövlət Proqramında qarşıya qoyulan vəzifələrin yerinə yetirilməsi istiqamətində görülən işlərin uğurlu davamı kimi qiymətləndirmişdir. 2005-ci il Samux rayonunda böyük abadlıq və quruculuq ili elan edilmişdir. Əsas diqqət uzun illərdən bəri yığılıb qalmış vacib məsələlərin həllinə yönəldilmişdir.
Mərasimdə çıxış edənlər son bir ildə rayonda aparılan quruculuq işlərindən danışmış, adamların işlə təminatı sahəsində həyata keçirilən tədbirlərə, habelə sahibkarlığın inkişafına göstərilən dövlət qayğısına görə, ölkəmizin başçısına minnətdarlıqlarını bildirmişlər. Yubiley şənlikləri musiqi kollektivlərinin çıxışları ilə başa çatmışdır.
