Şavkat Mirziyoyev Azərbaycanla müttəfiqlik münasibətləri haqqında Müqaviləni təsdiqləyib
Bakı, 22 may, AZƏRTAC
Özbəkistan Prezidenti Şavkat Mirziyoyev Azərbaycanla müttəfiqlik münasibətləri haqqında Müqavilənin təsdiq edilməsi barədə Qanunu imzalayıb.
AZƏRTAC Özbəkistan mediasına istinadla xəbər verir ki, 2024-cü il avqustun 23-də Azərbaycan Prezidenti İlham Əliyevin Özbəkistana dövlət səfəri çərçivəsində Daşkənd şəhərində imzalanmış “Azərbaycan Respublikası ilə Özbəkistan Respublikası arasında müttəfiqlik münasibətləri haqqında Müqavilə” iki qardaş ölkənin münasibətlərində yeni inkişaf mərhələsinin əsasını qoyub.
Aprelin 30-da Özbəkistan Senatı tərəfindən də ratifikasiya edilmiş bu sənəd ölkələrin bir-birinə qarşı yönəlmiş hər hansı blok və ya ittifaqlarda iştirak etməməsini ehtiva edir. Müqavilədə iki dövlət arasındakı strateji tərəfdaşlıq və müttəfiqlik münasibətlərinə zərər vuran hər hansı hərəkətlərdə iştirakdan çəkinmək kimi öhdəliklər də müəyyən edilib.
Bundan əlavə, sənəd siyasi əməkdaşlığın genişləndirilməsi, ticari-iqtisadi və mədəni-humanitar əlaqələrin inkişafı, yeni layihələrin həyata keçirilməsi üçün əlverişli şərait yaradır.
Bölmənin digər xəbərləri
