Səbail rayonunda Yeni Azərbaycan Partiyasının yaranmasının 21-ci ildönümü qeyd olunmuşdur
Bakı, 19 noyabr (AZƏRTAC). Azərbaycan Vətən Müharibəsi Veteranları Birliyinin Səbail rayon təşkilatının qərargahında Səbail Rayon İcra Hakimiyyətinin təşkilatçılığı ilə Yeni Azərbaycan Partiyasının yaradılmasının 21-ci ildönümünə həsr olunmuş tədbir keçirilmişdir.
Tədbirdə YAP Səbail rayon təşkilatının rəhbərliyi, Səbail rayon Ağsaqqallar, Veteran Təşkilatları şuralarının, Azərbaycan Vətən Müharibəsi Veteranları Birliyinin, rayondakı bir sıra ictimai təşkilatların, yerli bələdiyyələrin təmsilçiləri, ictimaiyyətin nümayəndələri iştirak etmişlər.
Səbail RİH-dən AZƏRTAC-a verilən məlumata görə, icra hakimiyyəti başçısının müavini Eldar Ağayev çıxış edərək bildirmişdir ki, ölkədə ictimai-siyasi proseslərin kifayət qədər mürəkkəb şəraitdə cərəyan etdiyi bir vaxtda dahi şəxsiyyət Heydər Əliyevin rəhbərliyi ilə 1992-ci il noyabrın 21-də təsis edilən Yeni Azərbaycan Partiyası qısa müddətdə ölkənin gələcək taleyini müəyyənləşdirən aparıcı siyasi qüvvəyə çevrilmişdir. Tarixi zərurətdən yaranan partiya ötən illər ərzində xalqa xidmət missiyasını şərəflə yerinə yetirmişdir. XX əsrin 90-cı illərinin əvvəllərində Azərbaycanı düşdüyü siyasi, iqtisadi, sosial və mənəvi böhrandan xilas edən ulu öndər Heydər Əliyevin rəhbərliyi ilə ölkəmiz qısa zaman kəsiyində böyük inkişafa nail olmuşdur. Bu gün partiyaya rəhbərlik edən Azərbaycan Prezidenti İlham Əliyev iqtisadi, siyasi, mədəni və digər sahələrdə ölkəmizin inkişafı istiqamətində mühüm işlər görmüşdür. Azərbaycan gündən-günə daha sürətlə inkişaf edir. Məhz bunun nəticəsidir ki, ötən ay keçirilən prezident seçkilərində İlham Əliyev yenidən böyük səs çoxluğu ilə Prezident seçilmişdir.
YAP Siyasi Şurasının üzvü, partiyanın Səbail rayon təşkilatının sədri, professor Zahid Qaralov Yeni Azərbaycan Partiyasının yaranması və qısa müddətdə ölkədə aparıcı siyasi qüvvəyə çevrilməsində ümummilli lider Heydər Əliyevin əvəzsiz rolu, 21 il ərzində partiyanın əldə etdiyi nailiyyətlər, ölkəmizin inkişafı və xalqımızın tərəqqisi üçün həyata keçirdiyi işlər barədə geniş məruzə ilə çıxış etmişdir. O demişdir ki, 1993-cü ildə xalqın təkidli tələbi ilə Azərbaycanda hakimiyyətə qayıtdıqdan sonra Heydər Əliyev ölkəni parçalanmaqdan qorumuş, xalqımızın xilaskarına çevrilmişdir. Məhz həmin dövrdə yeni yaranan partiya möhkəmlənmiş və inkişaf etmiş, ölkədə əmin-amanlığın yaradılmasına, iqtisadi inkişafa başlanmasına töhfələrini vermişdir.
Diqqətə çatdırılmışdır ki, YAP-ın ilk yaranan rayon təşkilatlarından biri olan Səbail rayon təşkilatının 107 ilk ərazi təşkilatında bu gün 22 min 636 nəfər üzv vardır. Təşkilat üzvlərinin 55,7 faizini qadınlar təşkil edir, 65,2 faizi isə gənclərdir.
Toplantıda çıxış edən Səbail Rayon Veteran Təşkilatları Şurasının sədri, Sosialist Əməyi Qəhrəmanı Ömər Ağayev, Beynəlxalq Avrasiya Mətbuat Fondunun rəhbəri, Azərbaycan Mətbuat Şurasının katibi Ümid Rəhimoğlu, Azərbaycan Vətən Müharibəsi Veteranları Birliyi Səbail rayon şöbəsinin sədri İlham Əliyev, müharibə veteranı Cəbrayıl Əliyev, istefada olan polkovnik Əzizağa Qənizadə, veteranlar ulu öndər Heydər Əliyevin yaradıcısı olduğu Yeni Azərbaycan Partiyasının uğurlarından danışmışlar. Qeyd edilmişdir ki, ölkədə əldə olunan uğurlar YAP-ın hər bir üzvünü sevindirir. Prezident İlham Əliyevin rəhbərliyi ilə bundan sonra da böyük nailiyyətlərə imza atılacaqdır.
Tədbirdə rayonun ictimai-siyasi həyatında fərqlənmiş bir qrup veterana fəxri fərman, YAP sıralarına yeni qəbul olunanlara üzvlük vəsiqələri təqdim edilmişdir.
Bölmənin digər xəbərləri
