Sədaqət Hüseynova: Miqren irsi meyilliliyi olan xəstəlikdir
Bakı, 18 aprel, AZƏRTAC
Miqren dünyada insanların həyat fəaliyyətinə mühüm təsir göstərən nevroloji xəstəliklər arasında ilk pillələrdədir. Dünya əhalisinin il ərzində 15 faizə qədəri miqrendən əziyyət çəkir. Xroniki gedişə malik miqren intensiv ağrılarla müşahidə olunur. Əsas xüsusiyyəti ağrı tutmalarının çox güclü olması, başın bir yarısında yerləşməsi və sutkalarla davam etməsidir. Miqren irsi meyilliliyi olan xəstəlikdir. Əgər valideynlərdən biri miqrenlə xəstədirsə, övladın miqren olma ehtimalı 50, hər ikisi xəstədirsə, bu ehtimal 75 faizə qədər yüksəlir. Statistika göstərir ki, miqren qadınlarda daha tez-tez rast gəlinir. Kişilərdə isə klaster tipli baş ağrıları üstünlük təşkil edir. Miqren adətən məktəb yaşlarından başlayır, qadınlarda klimaks dövrünə qədər davam edir. Klimaks dövründə hətta miqrenin intensivliyi azala və yaxud itə bilir.
Bunu AZƏRTAC-a müsahibəsində "Azərbaycan Miqren Mütəxəssisləri" İctimai Birliyinin sədri, professor Sədaqət Hüseynova deyib.
Professorun sözlərinə görə, miqren mərkəzi sinir sisteminin xəstəliyidir və xroniki gedişlidir: "Miqrenin müxtəlif formaları var. Aurasız miqren başın bir yarısında olan, pulsasiyaedici xarakterli ürəkbulanma, qusma ilə müşayiət olunan baş ağrılarıdır. Eyni zamanda, auralı deyilən miqren forması da mövcuddur. Bu tutmalar zamanı xəstələr tutmadan əvvəl sensor, vizual auralar hiss edə bilirlər. Auralar gözün qarşısında olan müxtəlif nöqtələr, ziqzaqlar, qaranlıq və ya bədənin bir tərəfində olan hissiyyat pozulması şəklində ola bilər. Xronikləşməyə meyilli xəstəlikdir. Onun müalicəsinin düzgün aparılması xronikləşmənin və həyat keyfiyyətinin pozulmasının qarşısını almağa səbəb olur.
Müasir dövrdə miqrenin müalicəsinə yanaşma iki istiqamətdədir. Birincisi ağrı tutmalarının müalicəsidir. Həmin dövr üçün çox böyük yeniliklər var. Miqren tutmaları üçün xüsusi dərmanlar qrupu işlənib hazırlanıb. Onların bir hissəsi bu gün Azərbaycanda var və biz həmin xəstələrə daha çox yardım edə bilirik. Xroniki miqrenin, yəni 15 gündən çox davam edən baş ağrısı qeydə alınan miqrenin, müalicə prinsipi tamamilə yenilənib və 3-6 ay ərzində müalicə aparılır. Bunlar miqrenli xəstələrdə həm tutmaların sayını, həm də intensivliyini azaltmağa kömək edir və həyat keyfiyyətinin pozulmasının qarşısını alır. Bu ağrılar böyük sosial və iqtisadi problem yaradır".
Miqren xəstələrinin sosial həyatdan da uzaqlaşdığını deyən S.Hüseynova fikirlərinə belə davam edib: "Ayın 15-20 günü güclü baş ağrıları içində olan adam əmək qabiliyyətini itirir, sosial həyatdan uzaqlaşır. Belə xəstələrdə həyəcan, depressiya kimi hallar inkişaf edir. Ona görə də, miqrenin diaqnozunun erkən və düzgün qoyulması, müalicəsinin düzgün aparılması bu gün çox aktual məsələdir.
Miqren ağrıları zamanı xəstələr müxtəlif ağrıkəsicilərdən istifadə edirlər. Həmin ağrıkəsicilər tez-tez istifadə olunduqda miqrenin kliniki gedişi pozulur və ikincili bir baş ağrısı yaranır. Buna "overuse medication"dan, yəni dərmanların ifrat istifadəsindən yaranan baş ağrısı deyilir. Bu, miqrenin gedişini pisləşdirir və insanın həyat keyfiyyətini aşağı salır. Həmçinin, ikinci bir müalicə, yanaşma tələb edir. Ümumiyyətlə, düzgün müalicə nəticəsində miqrenin idarə olunmasında əhəmiyyətli yaxşılaşma mümkündür".
Bölmənin digər xəbərləri
