SƏFİRLİKDƏ QURULTAY NÜMAYƏNDƏLƏRİ İLƏ GÖRÜŞ KEÇİRİLMİŞDİR

02.04.2006 [21:39]
Çap et
A⁺ A^-

AZƏRTAC-ın xüsusi müxbiri xəbər verir ki, ölkəmizin Özbəkistandakı səfirliyində Dünya azərbaycanlılarının II qurultayının iştirakçıları ilə görüş keçirilmişdir.

Səfir Namiq Abbasov yığıncaq iştirakçılarını salamlayaraq, qurultayın xarici ölkələrdə yaşayan soydaşlarımızın təşkilatlanması işində tarixi tədbir olduğunu vurğulamış, dövlətimizin başçısı İlham Əliyevin qurultaydakı dərin məzmunlu nitqi və ondan irəli gələn vəzifələr üzərində xüsusi dayanmışdır. N.Abbasov bildirmişdir ki, son iki ildə Azərbaycanın xarici ölkələrdə 21 səfirliyi açılmış, hazırda isə 46 səfirlik fəaliyyət göstərir. Bu, güclü Azərbaycan diasporu yaradılmasında böyük əhəmiyyət daşıyır. O, Prezident İlham Əliyevin Ermənistan-Azərbaycan, Dağlıq Qarabağ münaqişəsi ilə əlaqədar mövqeyi barədə tədbir iştirakçılarına geniş məlumat vermişdir.

Sonra Mobil Məmmədov, Almaz Məcidova və Vəfa Xamedova öz qurultay təəssüratlarını bölüşmüşlər.