ŞƏHİD AİLƏLƏRİNƏ VƏ QARABAĞ MÜHARİBƏSİ ƏLİLLƏRİNƏ YENİ MƏNZİLLƏR VERİLMİŞDİR
AZƏRTAC-ın müxbirləri xəbər verirlər ki, Azərbaycan Prezidenti İlham Əliyev iyunun 29-da Ucar şəhərində şəhid ailələri və Qarabağ müharibəsi əlilləri üçün tikilmiş yaşayış evinin istifadəyə verilməsi münasibətilə keçirilən mərasimdə iştirak etmişdir.
Şəhərin mərkəzində yerləşən 4 mərtəbəli 32 mənzilli bina dövlət vəsaiti hesabına tikilmişdir. İnşaat işləri “Azəraqrartikinti” Açıq Səhmdar Cəmiyyətinin Ucardakı 1 nömrəli Aqrotikinti filialı tərəfindən görülmüşdür.
Prezident İlham Əliyev və xanımı Mehriban Əliyeva ikinci qrup Qarabağ əlilləri Sadiq Baxışovun və Niyazi Müslümovun mənzillərində oldular, burada yaradılmış şəraitlə maraqlandılar. Müharibə əlilləri hər bir şəraiti olan bu mənzillərdə özlərini çox rahat hiss etdiklərini bildirdilər və dövlətin onlara göstərdiyi qayğını yüksək qiymətləndirdilər.
Sonra dövlətimizin başçısı yeni mənzil alanlara orderləri təqdim etdi. Şəhid ailələrinin üzvləri və Qarabağ müharibəsi əlilləri bu diqqət və qayğıya görə Prezident İlham Əliyevə ürəkdən minnətdarlıq etdilər, lazım gələrsə, Azərbaycanın ərazi bütövlüyü uğrunda bundan sonra da silaha sarılaraq, Ali baş komandanın əmrini yerinə yetirməyə hazır olduqlarını söylədilər.
Prezident İlham Əliyev onlara təşəkkür edərək dedi ki, mən sizi təbrik edirəm, Azərbaycan xalqı, dövləti, hökumət orqanları - hamımız çalışmalıyıq ki, şəhid ailələri, Qarabağ müharibəsi əlilləri yaxşı yaşasınlar, onların maddi vəziyyəti yaxşılaşsın, məişət problemləri öz həllini tapsın. Ona görə biz bu istiqamətdə böyük işlər görürük və bundan sonra da görməliyik. Siz buna layiqsiniz, siz Vətən uğrunda vuruşmusunuz, sağlamlığınızı itirmisiniz, şəhid olanlar var. Ona görə bütün aidiyyəti dövlət qurumları gərək sizin problemlərinizi həll etsinlər. Belə gözəl binanın tikilməsi də bizim tərəfimizdən atılmış növbəti bir addımdır. Siz daha da böyük işlərə layiqsiniz və Azərbaycanın qüdrəti möhkəmləndikcə, iqtisadi imkanlarımız artdıqca sizin problemləriniz daha da sürətlə öz həllini tapacaqdır. Sizi bir daha təbrik edirəm, yeni evlərdə xoşbəxt yaşayın.
Sonra yeni mənzillərin sahiblərinə Azərbaycan Prezidenti adından rəngli televizorlar hədiyyə olundu.
Bölmənin digər xəbərləri
