ŞƏHİDLƏRİN ƏZİZ XATİRƏSİNİ UCA TUTMAQ HƏR BİR AZƏRBAYCANLININ BORCUDUR
Şəhidlərimizin əziz xatirəsi bir dəqiqəlik sükutla yad edilmiş, onların ruhlarına dua oxunmuşdur.
Metropolitenin rəisi Tağı Əhmədov 1990-cı il yanvarın 20-də törədilən müsibətlərin acı nəticələrindən danışaraq demişdir ki, bu hadisə yaddaşlara faciə kimi həkk olunmaqla yanaşı, həm də Azərbaycan xalqının tarixinin qəhrəmanlıq səhifələrdəndir. Mərd oğul və qızlarımız canlarını qurban verməklə, xalqımızın mübarizə əzmini nümayiş etdirmişlər. Onların əziz xatirəsini uca tutmaq, ailə üzvlərinə qayğı göstərmək, eləcə də mənəvi dayaq olmaq hər bir azərbaycanlının vətəndaşlıq borcudur.
Qanlı hadisənin şahidlərindən olan Əli Cəfərli, Qədir Mehdiyev, Rəhilə Ramazanova bildirmişlər ki, hadisə baş verən gün metronun gecə səhərədək fasiləsiz işləməsi itkilərin artmasının qarşısını alan amillərdən olmuşdur. Həmin gün metropolitenin işçiləri vəzifələrinin öhdəsindən şərəflə gəlmiş, hadisələrin qaynar nöqtələrində olmuş və vətəndaşlıq borclarını ləyaqətlə yerinə yetirmişlər.
Gələcək nəsillərin qorxmaz və cəsur tərbiyə edilməsi üçün 20 Yanvar faciəsinin əsil mahiyyətinin izah olunmasının vacibliyindən danışan natiqlər ulu öndər Heydər Əliyevin bu faciəyə siyasi-hüquqi qiymət verilməsindəki xidmətlərini xatırlatmışlar. Əminliklə vurğulanmışdır ki, sürətli inkişaf yoluna çıxmış respublikamız Prezident İlham Əliyevin rəhbərliyi ilə qüdrətli və firavan ölkəyə çevriləcəkdir.
