QAN YADDAŞI
ŞƏHİDLƏRİN XATİRƏSİ ƏBƏDİ YAŞAYACAQDIR
Bakı, 19 yanvar (AZƏRTAC). Yanvarın 19-da Azərbaycan Müəllimlər İnstitutunda 20 Yanvar faciəsinin 20-ci ildönümünə həsr olunmuş tədbir keçirilmişdir.
Əvvəlcə faciənin dəhşətlərini əks etdirən videomaterial nümayiş olunmuş və respublikamızın müstəqilliyi, ərazi bütövlüyü uğrunda canlarından keçərək, şəhidlik zirvəsinə ucalmış Vətən övladlarının əziz xatirəsi bir dəqiqəlik sükutla yad edilmişdir.
Tədbirdə çıxış edən institutun rektoru, professor Aqiyə Naxçıvanlı xalqımızın tarixinə qanla yazılmış 20 Yanvar qırğınının səbəblərindən və mahiyyətindən danışmışdır. Bildirmişdir ki, həmin müdhiş gecədə yüzlərlə günahsız insan - qocalar, cavanlar, uşaqlar qanlarına qəltan edilmişlər.
Rektor keçmiş Sovet İttifaqı rəhbərləri tərəfindən onların respublikamızdakı əlaltılarının xəyanəti nəticəsində xalqımıza qarşı törədilmiş qanlı qırğının hüquqi-siyasi qiymətinin yalnız ümummilli liderimiz, dahi dövlət xadimi Heydər Əliyevin hakimiyyətə qayıdışından sonra verildiyini vurğulamışdır.
A.Naxçıvanlı demişdir ki, 20 il bundan əvvəl xalqımızın başına gətirilmiş faciənin qurbanları bu gün də böyük ürək ağrısı ilə yad edilir.
İnstitutun ictimai fənlər kafedrasının dosenti, əməkdar müəllim Səttar Allahverdiyev 20 Yanvar hadisələrindən bəhs olunan geniş məruzə ilə çıxış etmişdir.
Bildirilmişdir ki, 1990-cı il yanvarın 20-də Azərbaycan SSR Ali Sovetinin razılığı olmadan sovet qoşunları Bakı şəhərinə soxulmuşlar. Bununla da SSRİ-nin və Azərbaycan SSR-in konstitusiyaları kobudcasına və vəhşiliklə pozulmuşdur.
Ordu Bakıda və bütün Azərbaycanda dinc əhaliyə qarşı görünməmiş cinayətlər törətmiş və beynəlxalq konvensiyalara imza etmiş ölkənin rəhbərliyi tərəfindən insan hüquqları ayaqlar altına atılmışdır.
Natiq bu qanlı hadisələrə Azərbaycan xalqının ümummilli lideri Heydər Əliyevin təşəbbüsü ilə siyasi-hüquqi qiymət verildiyini qeyd etmişdir. Bildirmişdir ki, ulu öndər Heydər Əliyev təhlükə və təqiblərə baxmayaraq, 1990-cı il yanvarın 21-də Azərbaycanın Moskvadakı daimi nümayəndəliyinə gələrək cəsarətlə sovet rəhbərliyinə, kommunist rejiminə qarşı etirazla dolu bəyanat səsləndirmişdir.
Bildirilmişdir ki, böyük itkilərlə, günahsız insanların qətli ilə nəticələnən 20 Yanvar faciəsi Mixail Qorbaçov başda olmaqla cinayətkar imperiya rəhbərliyinin Azərbaycana qarşı xəyanətkar siyasətinə dözməyən, öz azadlığına, müstəqilliyinə can atan xalqımızın həm də mübarizliyini, əyilməzliyini, məğrurluğunu nümayiş etdirmişdir.
Məhz bunun nəticəsində uzun illərdən bəri arzusunda olduğumuz müstəqilliyə qovuşmuşuq. Qanlı hadisələrdən illər keçməsinə baxmayaraq, xalqımız o müdhiş gecəni daim xatırlayır, faciəni törədənlərə öz dərin nifrətini bildirir. Xalqımızın qan yaddaşında əbədi yaşayacaq 20 Yanvar faciəsini respublikamız hər il ümumxalq hüzn günü kimi geniş qeyd edir.
Sonra məruzə ətrafında çıxışlar dinlənilmiş və tələbələr şəhidlərimizə həsr olunmuş şeirlər söyləmişlər.
######