Şəki şəhərində Respublika elmi konfransı təşkil olunub
Bakı, 25 may, AZƏRTAC
Şəki şəhərində Ümummilli Lider Heydər Əliyevin anadan olmasının 100 illiyinə, Azərbaycan Xalq Cümhuriyyətinin yaranmasının 105 illiyinə və görkəmli ədəbiyyatşünas alim Salman Mümtazın doğum gününə həsr olunmuş Respublika elmi konfransı təşkil olunub.
AZƏRTAC xəbər verir ki, tədbir Azərbaycan Dövlət Pedaqoji Universitetinin (ADPU) Ümumi tarix və tarixin tədrisi texnologiyası kafedrası və ADPU-nun Şəki filialının humanitar fənlər kafedrasının birgə təşkilatçılığı ilə keçirilib. Konfrans iştirakçıları əvvəlcə Ulu Öndər Heydər Əliyevin abidəsini ziyarət edərək önünə gül dəstələri düzüblər.
Tədbiri açan ADPU Şəki filialının direktoru Rafiq Rasulov konfransın mövzusu olan əlamətdar günlərin xalqımızın tarixində yeri və rolu ilə bağlı düşüncələrini diqqətə çatdırıb. Daha sonra Ümummilli Lider Heydər Əliyevin quruculuq siyasəti, Azərbaycanda pedaqoji kadrların hazırlanmasında, təhsilin və ümumilikdə ölkəmizin inkişafında oynadığı rol haqqında məruzə edib.
Ardınca ADPU Şəki filialının direktor müavini Gülarə Abdullayevanın, ADPU-nun Ümumi tarix və tarixin tədrisi texnologiyası kafedrasının müdiri Sevinc Əliyevanın, Şəki filialının humanitar fənlər kafedrasının müdiri Vüsal Baxışovun, Təhsil İnstitutunun şöbə müdiri İntiqam Cəbrayılovun, Bakı Avrasiya Universitetinin professoru Ədalət Tahirzadənin, Milli Azərbaycan Tarixi Muzeyinin əməkdaşı Laçın Mustafayevin və digər mütəxəssislərin məruzələri dinlənilib.
Tədbirdə çıxış edən Salman Mümtazın nəvəsi, Şuşanın görkəmli Qalabəyovlar nəslindən olan Urxun Qalabəyli babası ilə bağlı xatirələrini bölüşüb, onun Azərbaycan elmi və ədəbiyyatı qarşısındakı xidmətlərinin önəmini konfrans iştirakçılarının diqqətinə çatdırıb.
Konfrans mövzular üzrə məruzələr və mədəni proqramla davam edib. Sonra konfrans iştirakçıları Şəkinin tarixi-mədəni abidələri və zəngin irsi ilə yaxından tanış olublar.
Tədbirdə ADPU-nun müəllim və professor heyəti ilə yanaşı, Azərbaycan Milli Elmlər Akademiyası, Təhsil İnstitutu, Bakı Avrasiya Universiteti, Mingəçevir Dövlət Universiteti, Qərb Universiteti və Quba Soyqırımı Memorial Kompleksinin əməkdaşları, elmi ictimaiyyətin nümayəndələri iştirak ediblər.
Bölmənin digər xəbərləri
