ŞƏKİNİN TƏSƏRRÜFATLARINDA MƏHSUL YIĞIMI DAVAM EDİR
Şəki Şəhər İcra Hakimiyyətindən AZƏRTAC-a bildirmişlər ki, rayonun fermer təsərrüfatlarında kənd təsərrüfatı məhsullarının yığımı davam edir.
İndiyədək 922 hektar tərəvəz sahəsindən 15,7 min ton məhsul tədarük edilmişdir ki, bu da ötən ilin müvafiq dövrü ilə müqayisədə 1.440 ton çoxdur. Bostan bitkiləri istehsalı da əvvəlki illə müqayisədə 2.951 ton artaraq 9 min 82 ton təşkil etmişdir. Bundan əlavə, kartof əkilmiş sahənin 844 hektarında yığım artıq başa çatmış, 8.650 ton məhsul əldə edilmişdir. Hər hektardan orta məhsuldarlıq 102 sentner olmuşdur.
Rayonun təsərrüfatlarında qaba yem tədarükündə də yüksək məhsuldarlıq əldə edilmişdir. İndiyədək biçənək sahələrindən 105 min tondan artıq qaba yem toplanmışdır ki, bu da keçən ilin eyni dövrü ilə müqayisədə 5 min ton çoxdur. Quru ot tədarükü əvvəlki illə müqayisədə 13 min 276 ton artaraq 64,3 min tona çatmışdır.
Hazırda rayonun təsərrüfatlarında dən üçün qarğıdalı, günəbaxan, kartof, tütün, meyvə və tərəvəz bitkilərinin yığımı davam edir.
Bölmənin digər xəbərləri
