SƏKKİZYAŞLI HƏMVƏTƏNİMİZ ELVİN XOCA “KLASSİK İRS” MÜSABİQƏSİNİN QALİBİ OLMUŞDUR
Gənc ifaçıların bu mötəbər müsabiqəsində ölkəmizi Azərbaycanın tanınmış musiqiçisi, məşhur skripkaçı, xalq artisti Sərvər Qəniyevin nəvələri - 8 yaşlı Elvin Xoca və 13 yaşlı Ceyla Qəniyeva təmsil edirlər.
Elvin Xoca müsabiqənin qalibi olmuşdur. 30 iştirakçının (6-10 yaşlarında) daxil olduğu ilk qrupda birinci mükafat ona təqdim edilmişdir. Elvin Xoca Kabalevskinin konsertini və digər əsərləri məharətlə ifa edərək, müxtəlif ölkələrin musiqiçilərindən ibarət münsiflər heyətinin rəğbətini qazanmışdır. Onların fikrincə, həmvətənimiz parlaq gələcəyə malik musiqiçidir. Elvin Türkiyədə keçirilən seçmə mərhələni uğurla başa vuraraq, yaşının az olmasına baxmayaraq, bu mötəbər beynəlxalq müsabiqədə qalib gəlmişdir. Onun ifası müsabiqəyə bütün dünyadan dəvət edilən tanınmış musiqiçilərin marağına səbəb olmuşdur. Gənc həmvətənimiz öz sərbəstliyi, məharəti və artistizmi ilə rəğbət qazanmışdır.
Hazırda Elvin Xoca Türkiyənin məşhur Bilkənd Universitetinin ibtidai məktəbində təhsil alır. Elvin bu ölkənin müxtəlif səhnələrində dəfələrlə çıxış etmişdir. Türkiyə KİV-ləri onu “Sehrli oğlan” və “Skripka virtuozu” adlandırırlar.
Ceyla Qəniyeva müsabiqənin ikinci yaş qrupunda (10-14 yaşlar) çıxış etmişdir. O, birinci mərhələni uğurla başa vuraraq, 5 ən yaxşı ifaçı ilə birlikdə sonuncu mərhələyə keçmiş və öz qrupunda üçüncü mükafata layiq görülmüşdür. Birinci mükafat heç kimə verilməmişdir, ikinci mükafatı isə iki rusiyalı gənc skripkaçı öz aralarında bölüşdürmüşdür.
Bölmənin digər xəbərləri
