SENTYABRDA BBVB-DƏ ELEKTRON HƏRRACLARININ HƏCMİ REKORD HƏDDƏ ÇATMIŞDIR
Birjanın informasiya-təhlil şöbəsindən AZƏRTAC-ın müxbirinə bildirmişlər ki, valyuta bölməsinin ümumi hərrac dövriyyəsində bağladıqları əqdlərin sayına görə ölkənin birja valyuta bazarının lider bankları sırasına Azərbaycan Beynəlxalq Bankı, “Rabitəbank” səhmdar-kommersiya bankı, “Bank Standard” Qapalı Səhmdar Cəmiyyəti, “Bank of Baku” səhmdar-kommersiya bankı və “Azəriqaz” səhmdar-sərmayə bankları daxildirlər.
BBVB-nin valyuta bölməsinin sentyabrda keçirilmiş hərraclarında 28 bank iştirak etmişdir. Hesabat ayında Elektron Hərraclarının Birja Bazarında 44 ticarət sessiyası keçirilmiş və 118 əqd qeydə alınmışdır. ABŞ dolları üzrə hərracların həcmi sentyabrda 499 milyard 088 milyon manat və ya 108,781 milyon dollar təşkil etmişdir. Əvvəlki ayla müqayisədə sentyabrda valyuta bölməsində hərracların həcmi 3,33 dəfə artmış və ötən ilin sentyabr ayındakı göstəricidən 12,68 faiz çox olmuşdur. Bütövlükdə BBVB-nin valyuta bölməsində bu ilin yanvar-sentyabr aylarında dövriyyə dollar ekvivalenti ilə 561,218 milyon olmuşdur.
Milli valyutanın birja məzənnəsi ötən ay 0,57 faiz, yaxud 26,15 manat bəndi möhkəmlənərək, 1 dollar üçün 4616,05 manatdan 4589,90 manata çatmışdır. Nəticədə AZM-in ABŞ dollarına nisbətdə orta hesablanmış məzənnəsi sentyabrda 1 dollar üçün 4588,01 manat olmuşdur. Halbuki avqustda bu göstərici 4653,30 manata bərabər idi. Cari ilin 9 ayının yekunlarına görə, manatın birja məzənnəsinin ABŞ dollarına nisbətən revalvasiyası 2004-cü ilin eyni dövrünə nisbətən 0,34 faiz əvəzinə 6,39 faiz olmuşdur.
