SENTYABRIN 28-DƏ AVSTRİYADA NÖVBƏDƏNKƏNAR PARLAMENT SEÇKİLƏRİ KEÇİRİLƏCƏKDİR
AZƏRTAC-ın xüsusi müxbiri xəbər verir ki, sentyabrın 28-də Avstriyada Milli Şuraya (parlament) növbədənkənar seçkilər keçiriləcəkdir.
Seçkilərdə 183 mandat uğrunda 10 partiya mübarizə aparacaqdır. Onlardan beşi (Avstriya Sosial-Demokratlar Partiyası, Avstriya Xalq Partiyası, Yaşıllar Partiyası, Avstriya Azadlıq Partiyası və Avstriya Naminə İttifaq) parlamentdə təmsil olunan partiyalar, beşi isə ölkə üzrə tələb olunan 2.600 imzanı toplamış partiyalardır (Avstriya Vətəndaş Forumu - Frits Dinkhauzer siyahısı, Xristianlar, Avstriya Kommunist Partiyası, Liberal Forum və “Avstriyanı xilas edin!” Müstəqil Vətəndaş Təşəbbüsü).
Seçkilərdən bir həftə əvvələdək aparılmış sorğuların nəticələrinə görə, böyük partiyalar - Sosial-Demokratlar və Xalq Partiyası hər biri 27-29 faiz səs toplamağa ümid bəsləyə bilər.
Avstriyanın 8,34 milyon əhalisindən 6,3 milyon nəfərinin seçki hüququ var. 2007-ci il seçki islahatından sonra seçicilərin yaş həddi 18-dən 16 yaşa endirilmişdir, ölkə əhalisinə məktub vasitəsilə də səs vermək imkanı yaradılmışdır. Eyni zamanda, parlamentin çağırış müddəti dörd ildən beş ilədək uzadılmışdır.
Hökumətdə təmsil olunan Avstriya Sosial-Demokratlar Partiyası və Avstriya Xalq Partiyası arasında uzun müddət davam edən böhran iyul ayında “böyük koalisiyanın” dağılması və sentyabrın sonu üçün növbədənkənar seçkilərin təyin edilməsi ilə nəticələnmişdir. Parlament seçkilərinin ilkin nəticələri sentyabrın 28-də gecə saatlarında, yekun nəticələr isə oktyabrın 6-dək elan ediləcəkdir.
Bölmənin digər xəbərləri
