Serdar Ünsal: Azərbaycanın təşəbbüsləri Türk dünyasında inteqrasiya proseslərini sürətləndirir
Ankara, 8 oktyabr, AZƏRTAC
Türk Dövlətləri Təşkilatına (TDT) üzv ölkələrin Dövlət Başçıları Şurasının Qəbələdə keçirilən 12-ci Zirvə Görüşü müasir çağırışlar və təhdidlər qarşısında türk ölkələrinin birliyini nümayiş etdirdi.
Bu barədə AZƏRTAC-a Türkiyə-Azərbaycan Dostluq Cəmiyyətləri Federasiyasının (TADDEF) sədr müavini Serdar Ünsal bildirib.
Onun sözlərinə görə, Azərbaycanda keçirilən Zirvə Görüşü Türk dünyasının gücünü və birliyini nümayiş etdirmək üçün yaxşı fürsət olub.
O, Türk dünyasında dialoq üçün TDT platformasının sabitliyin təmin edilməsində və sülhün qorunmasında təşkilatın potensialının açılmasında strateji əhəmiyyətini vurğulayıb. “TDT ölkələrinin birliyi dostlarda inam yaradır, düşmənlərdə narahatçılıq doğurur. Türk dövlətləri sülh və sabitliyə fəal töhfə verməyə hazırdırlar ki, bu da Qəbələdə açıq şəkildə ifadə olunub”, - deyə TADDEF rəhbərinin müavini vurğulayıb.
S.Ünsal Türk Dövlətləri Təşkilatının türk dövlətləri arasında müdafiə sahəsində əməkdaşlığın qurulması üçün təklif etdiyi imkanlara diqqət çəkib və Azərbaycanın artıq 2026-cı ildə birgə təlimlər keçirmək təşəbbüslərini “aktual” adlandırıb.
“Azərbaycan Prezidenti İlham Əliyevin TDT ölkələri arasında iqtisadi və müdafiə sahəsində qarşılıqlı fəaliyyətə dair təklifləri, şübhəsiz ki, Türk dünyasında inteqrasiya proseslərini sürətləndirəcək. Rəsmi Bakı TDT-nin nüfuzunun və gücünün gücləndirilməsinə töhfə verməyə hazır olduğunu nümayiş etdirir ki, bu da Cənubi Qafqazda sülhə verilən töhfədir”, - deyə TADDEF rəhbərinin müavini bildirib.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
