Serena Vilyams və Naomi Osaka “US Open” turnirinin finalına vəsiqə qazanıblar
Bakı, 7 sentyabr, Nicat Məmmədov, AZƏRTAC
Sentyabrın 7-də Nyu-Yorkda keçirilən qadınlar arasında tennis üzrə nüfuzlu turnirlərdən olan “US Open”in finalçıları məlum olub.
AZƏRTAC xəbər verir ki, ilk yarımfinal oyununda Serena Vilyams (№17) Anastasiya Sevastovoy (№19) ilə üz-üzə gəlib. Bu tennisçilər ilk dəfə qarşılaşıblar. Görüş 1 saat 7 dəqiqə davam edib və amerikalı idmançı Serena Vilyamsın qələbəsi ilə başa çatıb (6:3, 6:0).
Digər yarımfinalda Naomi Osaka (Yaponiya, №20) və Medison Kiz (ABŞ №14) qarşılaşıb. Görüş yaponiyalı idmançının qələbəsi ilə yekunlaşıb - 6:2, 6:4. Osaka 1 saat 27 dəqiqə ərzində qələbəsin təmin edərək finala vəsiqə qazanıb. Yaponiya təmsilçisi karyerasında ilk dəfə Medison Kizi məğlub edib. Bunadək üç dəfə qarşılaşan idmançıların mübarizəsində amerikalı tennisçi üstün olub. Osaka ilk dəfə olaraq “Böyük Dəbilqə” seriyasının finalına vəsiqə qazanıb. Bu vaxta kimi heç bir Yaponiya idmançısı final mərhələsində oynamayıb.
Final görüşü sentyabrın 9-da Bakı vaxtı ilə gecə saat 12-də başlayacaq.
Kişi tennisçilər arasında isə yarımfinal oyunları sentyabrın 8-də baş tutacaq. Rafayel Nadal (İspaniya, №1) Xuan Martin del Potro (Argentina, №3) ilə, Key Nisikori (Yaponiya, №21) isə Novak Cokoviç (Serbiya, №6) ilə üz-üzə gələcəklər.
Qeyd edək ki, “US Open” turnirinin mükafat fondu 53 milyon dollar təşkil edir.
Bölmənin digər xəbərləri
