SERGEY YESENİNİN ANADAN OLMASININ 110 İLLİYİ MÜNASİBƏTİLƏ
AZƏRTAC xəbər verir ki, görkəmli şairin doğum və xatirə günlərini hər il Mərdəkanda qeyd etmək bir ənənəyə çevrilmişdir. Bu il isə S.Yeseninin 110 illiyinə həsr olunmuş təntənəli mərasimdə onun ev-muzeyi ilə yanaşı, Rusiya Federasiyasının ölkəmizdəki səfirliyi, AMEA-nın Nizami adına ədəbiyyat muzeyi, Azərbaycanda rus icması, Rus Mədəniyyət Mərkəzi, ictimaiyyətin nümayəndələri, məktəblilər də iştirak etmişlər.
Qonaqlar əvvəlcə muzeydə şairin həyat və yaradıcılığını əks etdirən eksponatlarla tanış olmuşlar. Yubiley mərasimində Yesenin ev-muzeyinin əməkdaşı Nəzakət İbadova, Nizami adına ədəbiyyat muzeyi beynəlxalq əlaqələr şöbəsinin müdiri Şəfəq Əlibəyli, Rusiya Federasiyası səfirliyin nümayəndəsi Vladimir Jitnikov, xalq artisti, bəstəkar Tofiq Bakıxanov, Azərbaycanda rus icmasının nümayəndəsi Viktor Tatarenko, tarix elmləri doktoru Təvəkkül Səlimov və başqaları çıxış edərək, rus şairinin yaradıcılığından, Bakıya hədsiz sevgisindən danışmış, onun təkcə Rusiyanı deyil, Azərbaycanı da eyni məhəbbətlə tərənnüm etdiyini vurğulamışlar. Qeyd olunmuşdur ki, Yesenin poeziyası Rusiya və Azərbaycan xalqları arasında dostluğa böyük töhfə vermişdir.
Bədii hissədə Xətai, Əzizbəyov rayonları məktəblilərinin ifasında Yeseninin Azərbaycan dilinə tərcumə edilmiş şeirləri səslənmiş, gənc bəstəkar Gülsüm Abdullaqızının şairin sözlərinə bəstələdiyi mahnılar dinlənilmiş, məktəblilər Yeseninə həsr etdikləri şeirlərini söyləmişlər.
Bölmənin digər xəbərləri
