Sərhəd–buraxılış məntəqəsinin qurulması Prezident İlham Əliyevin sözünün və iradəsinin praktiki ifadəsidir - Politoloq
Bakı, 28 aprel, AZƏRTAC
Aprelin 23-ü saat 12:00-da Dövlət Sərhəd Xidmətinin bölmələri tərəfindən ölkəmizin suveren ərazilərində, Ermənistan ilə sərhəddə, Laçın-Xankəndi yolunun başlanğıcında sərhəd-buraxılış məntəqəsinin qurulması Azərbaycan dövlətinin məqsədi və xalqın istəyi idi. Bunu 44 günlük Vətən müharibəsində əldə etdiyimiz zəfərin son raundu da adlandırmaq olar. 2020-ci il 10 noyabr tarixli üçtərəfli Bəyanatdan sonra həm Azərbaycan-Ermənistan silahlı qüvvələri, həm də diplomatiyası arasında gərgin vəziyyətlər yarandı. Hər iki müstəvidə Azərbaycan öz iradəsini, gücünü nümayiş etdirərək qələbəsini təmin edə bildi.
Bu fikirləri AZƏRTAC-a açıqlamasında Ana Vətən Partiyası sədrinin müavini, politoloq Yalçın Hacızadə söyləyib.
“Üçtərəfli Bəyanatın digər tərəfləri sülhdən çox, münaqişə yaratmağa çalışsalar da, Azərbaycan 30 ildən sonra həmin ərazilərdə sərhədlərinə nəzarəti bərpa edə bildi. Prezident İlham Əliyev çıxışlarında və müzakirələrdə dəfələrlə bəyan edirdi ki, “Qarabağ münaqişəsi bitib və Azərbaycan bu məsələni daha kiminləsə müzakirə etməyəcək”. Sərhəd-buraxılış məntəqəsinin qurulması Prezident İlham Əliyevin sözünün və iradəsinin praktiki ifadəsidir. Yəni, Azərbaycan sübut etdi ki, öz məqsədinə çatmaq üçün kimlərdənsə icazə almayacaq. Həmçinin kimlərinsə fəaliyyətlərinin, bəyanatlarının məqsədimizə çatmağımızda heç bir təsiri ola bilməz.
Əlbəttə, bu nəticəyə gələnədək bəzi qonşu dövlətlərin və Avropa ölkələrinin kifayət qədər təxribatlarını gördük. Erməni silahlı qüvvələrinin ərazilərimizdə qalması, Rusiyanın onlara silah daşımağa şərait yaratması, Moskvanın Ruben Vardanyan planı, təbii sərvətlərimizin talan edilməsi, İran vətəndaşlarının qanunsuz olaraq torpaqlarımıza keçməsi və Fransanın sərsəm bəyanatları fonunda sərhəd-buraxılış məntəqəsinin qurulması regionda yeni reallığı qəbul etmək istəməyən, Azərbaycanın güclənməsini yox, məğlubiyyətini arzulayan qüvvələrə verilən tutarlı cavab idi.
Azərbaycan müharibədə Qələbə əldə etməmişdir ki, kimlərsə onun torpaqlarına qanunsuz keçərək fəaliyyət göstərsin. Dəfələrlə bəyan edildiyi kimi, buna son qoyulmalı idi və Azərbaycan son qoydu. Dövlət sərhədlərimizdə öz silahlı qüvvələrini yerləşdirməyə çalışan və buna görə də təxribatlar törədən qüvvələr var. Ermənistan da çalışır ki, sərhədlərində Avropa İttifaqı ölkələrinin qoşunlarını yerləşdirsin. Bu kimi planlar da dağıdıldı. Hər kəsə göstərildi ki, Azərbaycan öz sərhədlərini quracaq, qoruyacaq gücdə və imkandadır”,-deyə politoloq əlavə edib.
O bildirib ki, Qələbədən sonra Azərbaycan Ermənistana sülhün əldə olunması üçün beş bənddən ibarət rəsmi təklif göndərmişdi. Həmin bəndlərdən biri də hər iki tərəfdən dövlət sərhədlərinin müəyyən edilməsi idi. Lakin Ermənistan təklifi qəbul etməyərək, dövlət sərhədlərinin tanınmasından imtina etdi. Bu da bizə əsas verdi ki, öz sərhədlərimizi birtərəfli qaydada müəyyən edək, mühafizəsini və buraxılış rejimini tənzimləyək.
Azərbaycanın regionda bütün fəaliyyəti sülhün təmin olunmasına yönəlib. Elə ona görə də Azərbaycan Qələbədən dərhal sonra sülh çağırışlarına və müzakirələrinə başladı. Bundan əlavə, dövlətimiz Ermənistanın işğalı nəticəsində dağıdılmış yaşayış məskənlərini, infrastrukturu bərpa edir. Regionun coğrafi mövqeyindən, nəqliyyat-kommunikasiya imkanlarından birgə istifadə edilməsində maraqlı olduğunu nümayiş etdirir.
Prezident İlham Əliyevin rəhbərliyi ilə aparılan ardıcıl, uğurlu hərbi və diplomatiya fəaliyyəti Azərbaycana qarşı olan bütün planları sıradan çıxardı və ölkəmizin ərazi bütövlüyünü və suverenliyini təmin etdi.
Bölmənin digər xəbərləri
