Şərqi Zəngəzurda həyata keçirilən bərpa modeli dünya şəhərsalma təcrübəsinə yeni yanaşma gətirir - ŞƏRH
Bakı, 11 may, AZƏRTAC
Prezident İlham Əliyevin işğaldan azad olunmuş ərazilərə, xüsusilə də Zəngilana son səfəri Qarabağda aparılan genişmiqyaslı quruculuq və bərpa işlərinin strateji mahiyyətini bir daha nümayiş etdirir.
Bu fikirləri AZƏRTAC-a açıqlamasında Milli Məclisin deputatı Fariz İsmayılzadə deyib.
Deputat bildirib ki, azad edilmiş ərazilərdə həyata keçirilən layihələr ilk növbədə keçmiş məcburi köçkünlərin doğma yurdlarına təhlükəsiz və rahat şəkildə qayıdışına xidmət edir.
“Bu gün Qarabağ və Şərqi Zəngəzurda dünya səviyyəli şəhərsalma layihələri həyata keçirilir. Müasir yaşayış məntəqələri salınır, sosial infrastruktur qurulur, insanların normal yaşayışı və fəaliyyəti üçün hərtərəfli şərait yaradılır. Həyatın həmin torpaqlara qayıtması bir daha göstərir ki, Azərbaycan bu torpaqların həqiqi sahibidir və dövlət siyasətinin əsas prioritetlərindən biri Qarabağın dirçəldilməsidir”, – deyə F.İsmayılzadə vurğulayıb.
Onun sözlərinə görə, Azərbaycanın işğaldan azad olunmuş ərazilərdə həyata keçirdiyi bərpa və yenidənqurma prosesi dünya şəhərsalma təcrübəsində yeni model kimi qiymətləndirilə bilər.
“Bu gün dünyada hər hansı ölkənin öz ərazilərini işğaldan azad etdikdən sonra bu qədər genişmiqyaslı və sistemli bərpa işləri həyata keçirməsinə dair nümunə azdır. Qarabağda aparılan rekonstruksiya beynəlxalq standartlara uyğun şəkildə icra olunur, yaşıl texnologiyalar tətbiq edilir, “ağıllı şəhər” və “ağıllı kənd” konsepsiyaları reallaşdırılır. Azərbaycan bu təcrübə ilə qlobal şəhərsalma və dayanıqlı inkişaf sahəsinə yeni yanaşma təqdim edir”, – deyə deputat bildirib.
Fariz İsmayılzadə əlavə edib ki, hazırda Qarabağda və Şərqi Zəngəzurda həyat sürətlə canlanır:
“Artıq on minlərlə insan həmin ərazilərdə yaşayır, çalışır və təhsil alır. Bu proses regionda sabitliyin, inkişafın və dayanıqlı sülhün möhkəmlənməsinə Azərbaycanın verdiyi mühüm töhfədir”.
Müxbir - Pərvanə Qafarova
Bölmənin digər xəbərləri
