ELM VƏ TƏHSİL
Şərqşünaslıq İnstitutu 2023-cü ildə zəngin və dəyərli nəşrləri ilə seçilib
Bakı, 31 yanvar, AZƏRTAC
AMEA-nın akademik Ziya Bünyadov adına Şərqşünaslıq İnstitutunda 2023-cü ildə ümumilikdə 40-a yaxın monoqrafiya, kitab, məqalələr toplusu və jurnal çapdan çıxıb.
Bu barədə AZƏRTAC-a institutdan məlumat verilib. Bildirilib ki, institutun nəşrləri elmi əhəmiyyəti ilə diqqəti çəkir.
Ölkə Prezidentinin “Azərbaycan Respublikasında “Heydər Əliyev İli” elan edilməsi haqqında” Sərəncamı ilə əlaqədar Şərqşünaslıq İnstitutunda Ulu Öndər Heydər Əliyevlə bağlı bir neçə kitab, toplu və jurnal nəşr olunub.
Akademik Gövhər Baxşəliyevanın “Unudulmaz Lider” kitabında müəllifin müxtəlif vaxtlarda Ümummilli Liderin zəngin həyat yolunu, çoxşaxəli titanik fəaliyyətini, dövlətimizin inkişafı naminə həyata keçirdiyi fövqəladə missiyanı təhlil edən məqalələri, müsahibələri, çıxışları yer alıb. Nəşrdə, həmçinin son 20 ildə Prezident İlham Əliyevin rəhbərliyi ilə ölkəmizdə həyata keçirilən hərtərəfli fəaliyyəti əks etdirən yazılar, Ulu Öndərlə bağlı müəllifin xatirələri yer alır.
İl ərzində institutda filologiya elmləri doktoru Elman Quliyevin türk dilində “Heydər Əliyev və Türk dünyası”, coğrafiya üzrə fəlsəfə doktoru Rafiq Abbasovun Çin dilində “Heydər Əliyev-100. Çin səfərinin tarixi”, fəlsəfə üzrə fəlsəfə doktoru Elnur Mustafayevin “Şuşanın maddi-mədəni irsi (epiqrafik abidələr əsasında)” kitabları, “Heydər Əliyev və müasir Şərq” mövzusunda beynəlxalq elmi konfransın tezisləri, “Zəmanəmizin dahi azərbaycanlısı” adlı məqalələr toplusu və “Azərbaycan şərqşünaslığı” jurnalının Ümummilli Liderə həsr olunmuş sayı çapdan çıxıb.
Ötən il institutun alimləri - Sübhan Talıblının “İnsanlıq əleyhinə cinayətlər (XX əsr)”, tarix üzrə fəlsəfə doktoru Fərda Əsədovun “Xəzərlər və Azərbaycan” kitabları Təbrizdə nəşr etdirilib. O cümlədən tarix üzrə fəlsəfə doktorları Esmeralda Ağayevanın və Fərda Əsədovun ərəb dilindən tərcümə etdikləri kitab Moskvada çapdan çıxıb.
Solmaz Rüstəmova-Tohidinin rus dilində “Qarabağ-Zəngəzur. 1918-ci il. Azərbaycan qırğınları sənədlərdə”, Mehdi Kazımovun rus dilində “Ədəbi irsin görünməyən tərəfləri”, Elman Quliyevin “Türk xalqları ədəbiyyatı”, Vidadi Mustafayevin “Bir daha Vahid və Bütöv Azərbaycan ərazisi haqqında” kitabları, Namiq Məmmədovun “Müasir dünyanın neft problemi” “Mahşərəf Məsturənin poeziyası” monoqrafiyaları isə öz aktuallığı, elmi dəyəri ilə seçilir.
Şərqşünaslıq İnstitutunda 2023-cü ildə bir sıra tərcümə əsərləri, o cümlədən ötən il elmi müəssisədə keçirilmiş konfransların materialları və tezisləri də çapdan çıxıb.