Sərtləşdirilmiş karantin rejiminin tətbiq ediləcəyi ərazilərdə hərəkətə nəzarət Daxili İşlər Nazirliyinə həvalə olunub
Bakı, 12 iyun, AZƏRTAC
Sərtləşdirilmiş karantin rejiminin tətbiq ediləcəyi ərazilərdə hərəkətə nəzarət Daxili İşlər Nazirliyinə həvalə olunub. İyunun 14-də saat 00:00-dan iyunun 16-da saat 06:00-dək Bakı, Gəncə, Lənkəran və Sumqayıt şəhərlərinin, Abşeron, Yevlax, İsmayıllı, Kürdəmir və Salyan rayonlarında əhalinin yaşayış yerlərini və ya olduğu yerləri tərk etməsi qadağan olunur. Həmin tarixlərdə bu ərazilərdə yalnız fəaliyyətinə icazə verilən şəxslərin hərəkətinə icazə veriləcək.
AZƏRTAC xəbər verir ki, bu barədə iyunun 12-də Nazirlər Kabineti yanında Operativ Qərargahın təşkil etdiyi mətbuat konfransında Baş Dövlət Yol Polisi İdarəsinin ictimaiyyətlə əlaqələr şöbəsinin rəisi, polis polkovniki Kamran Əliyev deyib.
“Sakinlər qeyd olunan müddətdə yaşayış yerlərini və ya olduqları yerləri həyat və sağlamlığa bilavasitə təhlükəli vəziyyət yarandığı halda, eləcə də təxirəsalınmaz tibbi yardıma ehtiyac olduqda yalnız təcili tibbi yardım xidməti vasitəsilə, habelə yaxın qohumların dəfnində iştirak etmək üçün Daxili İşlər Nazirliyinin Növbətçi Hissələri İdarəetmə Xidmətinin 102 Xidməti - Zəng Mərkəzi vasitəsilə icazə almaqla tərk edə bilərlər. Digər vətəndaşlardan xahiş edirik ki, karantin günlərində evlərini tərk etməsinlər”, - deyə Kamran Əliyev vurğulayıb.
Bölmənin digər xəbərləri
