SİFƏTİN SİMMETRİK OLMASI NƏDƏN XƏBƏR VERİR?
Aparılmış tədqiqatların nəticələrinə görə, sifətinin sağ yarısı sol yarısını güzgü dəqiqliyi ilə təkrarlayan adamlar daha güclü immun sisteminə malik olurlar. Bu isə istər adi soyuqdəyməyə, istərsə də kəskin virus infeksiyalarına da müvəfəqiyyətlə müqavimət göstərməyə imkan verir.
Sifətin simmetriyası insan orqanizmində kişi və qadın cinsiyyət hormonlarının düzgün nisbətindən asılıdır. Alimlər belə nəticəyə gəlmişlər ki, simmetrik sifətli qadınlar daha zərif, kişilər daha mərd olurlar.
İngiltərənin Nortumbriya Universitetində bu problemlə məşğul olan doktor Nik Niv demişdir: “Simmetrik sifət sizi instinktiv səviyyədə cəlb edir. Adamlar ailə qurmaq üçün həmişə daha sağlam tərəfdaş seçməyə çalışırlar. Simmetrik sifət isə sağlam genlər deməkdir”.
Alimlər bir neçə il hər iki cinsdən olan dörd yüz gəncin üzərində müşahidə aparmışlar. Sonra onların tibbi kartlarını müqayisə etmişlər. Tədqiqatların yekununa görə, nəticələr birmənalıdır – düzgün sifət cizgiləri olan adamlar az-az xəstələnir və xəstəliyi asan keçirirlər. Bununla bərabər, onların reproduktiv qabiliyyəti simmetrik sifətə malik olmayanların qabiliyyətindən daha yüksəkdir.
Bu məsələnin öyrənilməsi prosesində alimlər gözlənilmədən belə qənaətə də gəlmişlər ki, ölçüsünə və formasına görə sağ qaşları, qulaqları və barmaqları soldakılardan fərqlənən qadınlar cinsi əlaqə zamanı başqa tərəfdaş haqqında düşünməyə meyillidirlər.
Bölmənin digər xəbərləri
