Şimal bölgəsində fəaliyyət göstərən televiziya əməkdaşları media savadlılığı barədə məlumatlandırılıb
Bakı, 12 may, AZƏRTAC
Mayın 12-də Audiovizual Şuranın təşkilatçılığı ilə “ARB Şimal” televiziya redaksiyasının Xaçmaz şəhərində yerləşən inzibati binasında “Audiovizual mediada saxta və təhrif olunmuş məlumatların yayılmasına qarşı mübarizə” və “İnsan alveri ilə mübarizədə audiovizual medianın rolu” mövzularında dəyirmi masa keçirilib.
Audiovizual Şuradan AZƏRTAC-a bildirilib ki, keçirilən görüşdə “ARB Şimal”, “ARB Günəş”, “Qafqaz TV” regional televiziya kanallarının ümumi proqram rəhbərləri və xəbər redaksiyalarının məsul əməkdaşları iştirakı ediblər.
Tədbiri açan Şura sədrinin köməkçisi Haşim Əliməmmədzadə adı keçən mövzularla bağlı maarifləndirmə işlərinin aparılmasının əhəmiyyətindən və bu istiqamətdə televiziya kanallarının rolundan danışıb.
"İnsan alveri ilə mübarizədə audiovizual medianın rolu" mövzusunda çıxış edən Şura əməkdaşı Ayxan Sadıqlı insan alverinə qarşı mübarizədə təbliğat və maarifləndirmə işinin gücləndirilməsinə, bu məqsədlə müxtəlif sosial çarxların, qısametrajlı filmlərin, proqramların hazırlanıb nümayiş etdirilməsinin vacibliyini vurğulayıb. O, həmçinin informasiyanın yayılmasına, məlumatın mənbəyinin açıqlanmasına yol verilməyən hallar haqqında da ətraflı danışıb.
Sonra görüş “Saxta və təhrif olunmuş məlumatların - “fake news” yayılmasına qarşı mübarizə” mövzusu ilə davam edib. Bildirilib ki, saxta və təhrif olunmuş məlumatların yayılmasına qarşı mübarizə audiovizual media redaksiyaları üçün prioritet məsələlərdən biri olmalıdır. Bu sahədə media savadlılığının əhəmiyyətli rolundan danışılarkən qeyd edilib ki, media savadlılığının olmaması insanların informasiya bolluğu şəraitində doğru olanı seçə bilmək imkanlarını azaldır. Media savadlılığı bütün yaş kateqoriyaları üçün vacib olsa da, azyaşlıların, yeniyetmə və gənclərin bu istiqamətdə maarifləndirilməsi xüsusilə vacibdir.
Daha sonra Şuranın əməkdaşı Kamran Əliyev “Media haqqında” Qanunun pozulması ilə əlaqədar Azərbaycan Respublikası İnzibati Xətalar Məcəlləsinə edilmiş əlavələr və tətbiq oluna biləcək sanksiya tədbirləri haqqında məlumat verib.
Regional televiziya redaksiyalarının əməkdaşları həmin mövzularda proqramların hazırlanması, həssas mövzuların işıqlandırılması, habelə uşaqlara aid proqramların özəllikləri ilə bağlı yaranan sualları Şura əməkdaşlarına ünvanlayıb və müvafiq izahatlar əldə ediblər.
Daha sonra Şuranın nümayəndələri bu mövzularda xüsusi maarifləndirici proqramların təşkil edilməsi, sosial çarxların yayımlanması və yayımlar haqqında Şuraya hesabatların təqdim olunması ilə bağlı da sualları cavablandırıblar.
Bölmənin digər xəbərləri
