Şimal-qərb bölgəsində tütün əkini ilə əlaqədar fermerlərlə müqavilələr bağlanılır
Zaqatala, 8 yanvar, Mustafa Dadaşov, AZƏRTAC
“Azərtütün” Açıq Səhmdar Cəmiyyəti (ASC) respublikanın şimal-qərb bölgəsinə daxil olan Balakən, Zaqatala, Qax, Şəki və Oğuz rayonlarında builki mövsüm üçün tütün əkininə hazırlıq işlərinə başlayıb. Tütün istehsalı ilə əlaqədar cəmiyyət tərəfindən indiyədək 28 fermerlə müqavilə bağlanılıb və hazırda proses davam etdirilir.
Bu barədə AZƏRTAC-ın bölgə müxbirinə Səhmdar Cəmiyyətdən məlumat verilib. Bildirilib ki, indiyədək fermerlərlə bağlanılan müqavilələr üzrə tütün əkiləcək sahə 361 hektar təşkil edir. Bundan əlavə, şirkətin özü tərəfindən də bu il şimal-qərb bölgəsində 426 hektar sahədə tütün əkilməsi nəzərdə tutulur.
“Azərtütün” ASC ötənilki mövsümdə şimal-qərb bölgəsi rayonlarında 662,1 hektar sahədə “Virciniya botaniki” növlü tütün əkib. Bunun 218,3 hektarı şirkətə, 443,8 hektarı isə fermerlərə məxsus sahələr olub. Tütün istehsalı ilə əlaqədar 57 fermerlə müqavilə bağlanıb. Mövsüm ərzində ASC-nin bölgədə fəaliyyət göstərən tütün istehsalı və emalı məntəqələrinə fermerlərdən 8 min 188,8 ton yaş tütün daxil olub. Emal məntəqələrində yaş tütündən 1230,3 ton quru tütün istehsal olunub. Bu, əvvəlki illə müqayisədə 130,3 ton çoxdur.
Bölmənin digər xəbərləri
