Şimali Kiprdə Türk Dövlətləri Təşkilatı Ağsaqqallar Şurasının 17-ci iclası keçirilib
Ankara, 2 may, AZƏRTAC
Mayın 2-də Şimali Kipr Türk Cümhuriyyətinin (ŞKTC) şimalında yerləşən Girne şəhərində Türk Dövlətləri Təşkilatının (TDT) Ağsaqqallar Şurasının 17-ci iclası keçirilib.
AZƏRTAC xəbər verir ki, müzakirələrdə TDT Ağsaqqallar Şurasının sədri Binəli Yıldırım, TDT-nin Baş katibi Kubanıçbek Ömüralıyev, Azərbaycan tərəfindən ağsaqqal Həsən Həsənov, həmçinin ŞKTC, Qazaxıstan, Qırğızıstan və digər ölkələrin nümayəndələri iştirak edirlər.
Tədbirin açılışında çıxış edən B.Yıldırım TDT tədbirlərinin ŞKTC-də keçirilməsinin əhəmiyyətini qeyd edib və Lefkoşaya müşahidəçi statusunun verilməsini “tarixi qərar” adlandırıb.
Onun sözlərinə görə, ŞKTC-nin fəal inkişafı bir çox sahələrdə özünü göstərir, respublikanın mövqeyi isə güclənir və bunun aydın göstəricisi kimi Lefkoşada davam edən “TEKNOFEST-2025” festivalını göstərmək olar.
B.Yıldırım TDT Ağsaqqallar Şurası üzvlərinin “TEKNOFEST-2025”in açılış mərasimində iştirak etmək qərarını alqışlayıb.
Kipr səfəri çərçivəsində ağsaqqallar ŞKTC-nin xarici işlər naziri Tahsin Ertuğrul ilə də görüş keçirib, qarşıdakı dövr üçün plan və layihələri müzakirə ediblər.
“Bu gün biz Girnedə Türk dünyasının ortaq gələcəyinə yeni təkan vermək üçün toplaşmışıq”, – deyə Yıldırım qeyd edib və Bişkekdəki TDT sammitində Türk Dünyası–2040 Konsepsiyasının həyata keçirilməsi məqsədilə imzalanmış 16 sənədi xatırladıb.
TDT Ağsaqqallar Şurasının sədri Orta Dəhlizin inkişafının əhəmiyyətinə də diqqət çəkib və bu marşrutun bütün türkdilli dövlətlərin inkişafını sürətləndirəcəyini bildirib.
Bundan əlavə, B.Yıldırım COP29-un Azərbaycandakı nəticələrini alqışlayıb və 20–22 may tarixlərində Budapeştdə keçiriləcək TDT-nin qeyri-rəsmi sammitindən məhsuldar nəticələr gözlədiyini ifadə edib.
“Bu gün, eləcə də Budapeştdəki Ağsaqqallar Şurasının iclasının yekunlarına dair qəbul edəcəyimiz qərarlar oktyabrda Azərbaycanda keçiriləcək Türk dünyası liderlərinin müzakirəsinə təqdim olunacaq”, - deyə o bildirib.
TDT Ağsaqqallar Şurasının sədrinin sözlərinə görə, 34 hərfdən ibarət ümumi türk əlifbasının qəbulu da xüsusi əhəmiyyət daşıyır.
İclas mətbuat üçün qapalı formatda davam edib.
Ankara
Bölmənin digər xəbərləri
